მოძრაობა ლელოს ლიდერი და თიბისი ბანკის ერთ-ერთი დამფუძნებელი მამუკა ხაზარაძე ბიზნესისა და სამუშაო ადგილების შესანარჩუნებლად 0%-იანი სესხების გაცემის ინიციატივით გამოდის. მამუკა ხაზარაძის თქმით, ლელოს აქვს 6 მილიარდ ლარიანი ფინანსური ანტიკრიზისული გეგმა და რეკომენდაციებიდან ერთ-ერთი ყველაზე მნიშვნელოვანი 3 მილიარდი ლარის საგარანტიო ინსტრუმენტის შექმნაა.
„ამ გარანტიის საფუძველზე ბანკებმა უნდა დაიწყონ ნულოვანი საპროცენტო განაკვეთით მცირე და საშუალო ბიზნესის დაფინანსება იმ პირობით, რომ ისინი სამუშაო ადგილებს შეუნარჩუნებენ თავიანთ თანამშრომლებს. ამ ფინანსური მექანიზმით გადავარჩენთ ბიზნესს და მასში დასაქმებულ ადამიანებს სამუშაოს დაკარგვისგან. ასეთი სესხების გაცემა უნდა მოხდეს დროში ოპერატიულად და მაქსიმალურად ნაკლები ბიუროკრატიით“, — ამბობს მამუკა ხაზარაძე.
„კავკასიის უნივერსიტეტის“ ეკონომიკის სკოლის დეკანი სოსო ბერიკაშვილი მიიჩნევს, რომ ბანკებისთვის 0%-იანი სესხების გაცემა მარტივად განსახორციელებელი ინიციატივა არ არის. მისივე თქმით, მნიშვნელოვანია, რომ ხელი შევუწყობთ იმ ბიზნესს რომელსაც ზარალი მიადგა, მაგრამ ამით საბანკო სისტემა საფრთხის ქვეშ არ უნდა დავაყენოთ.
„ბანკისთვის მსგავსი ინიციატივა პრობლემაა, რადგან საფინანსო ინსტიტუტისთვის არსებული ფული უფასო არ არის, ის 0%-იან სესხს ყველაზე ვერ გასცემს, რადგან მას აქვს ხარჯი, მაშინ გამოდის რომ უნდა იზარალოს. ვინ აუნაზღაურებს ბანკებს ამ დანაკლისს? - ამ შემთხვევაში ან სახელმწიფომ უნდა დაეხმაროს ბანკებს ან ეს ზარალი თავისით უნდა აანაზღაურონ. თუმცა ორივე შემთხვევაში რთულია, შეიძლება ზოგიერთ ბიზნესზე მოხდეს რაიმე შეღავათების დაწესება, მაგრამ 0%-იანია სესხების გაცემა მარტივად განსახორციელებელი ინიციატივა ბანკებისთვის ნამდვილად არ არის. ჩვენთვის მნიშვნელოვანია, რომ მცირე ბიზნესს ან ნებისმიერ ბიზნესს რომელსაც ზარალი მიადგა, ხელი შევუწყობთ, მაგრამ ისე არ უნდა გავაკეთოთ, რომ ამან საბანკო სისტემის ნგრევა გამოიწვიოს. საბოლოოდ უნდა დავიცვათ შუალედი და გავითვალისწინოთ როგორც ბიზნესის და მოსახლეობის ასევე საბანკო სფეროს ინტერესები და ხარჯი“, - აცხადებს სოსო ბერიკაშვილი.
თავისუფლებისა და დემოკრატიის ფონდის აღმასრულებელი დირექტორი ანა გოგოლაძე მიიჩნევს, რომ 0%-იანი თან დიდი ალბათობით სარისკო სესხების გაცემა არსებულ პირობებში ბანკებისთვის ძალიან საფრთხილოა.
„ეს ძალიან სარისკო ინიციატივაა მთლიანად ეკონომიკისთვის და საბანკო სისტემის მდგრადობისთვის. კორონავირუსის საფრთხის გაჩენისთანავე, მოსახლეობამ აქტიურად დაიწყო ბანკებიდან დეპოზიტების გამოტანა, რამაც საფინანსო ინსტიტუტები პრობლემის წინაშე დააყენა. ეს ინიციატივა კი გულისხმობს, 0%-იანი თან დიდი ალბათობით სარისკო სესხების გაცემას, რაც ბანკებისთვის ძალიან საფრთხილოა. გარდა ამისა, ეს იქნება დიდი ლიკვიდურობა ეკონომიკაში და ისედაც გაუფასურებულ ლარს და გაზრდილ ფასებს კიდევ უფრო ცუდ ინერციას მისცემს“, - განმარტავს ანა გოგოლაძე.
ნინო თამაზაშვილი