5 სექტემბრიდან „შენEat“ ქართველ მომხმარებელს ინოვაციურ სერვისს შესთავაზებს. ვისაც სახლში კერძების მომზადება უყვარს, თუმცა რეცეპტებისა და ინგრედიენტების დეფიციტს განიცდის, ირაკლი ხუნდაძის, გიორგი ასათიანისა და მიხეილ ნარიაშვილის მიერ შეთავაზებული სერვისის - „შენEat“ გამოყენებით სასურველი კერძის ახლებურ ვერსიას ინგრედიენტებთან ერთად სახლში მიუტანენ.
„შენEat“ სერვისი დაახლოებით 7 მიმართულებას მოიცავს და საერთო ჯამში, ბაზარზე 60 სეგმენტირებული კერძით შედის.
„ჩვენი პროდუქტის უნიკალურობა არის ის, რომ შეკვეთიდან ერთი დღის განმავლობაში მომხმარებელს ყველა საჭირო რეცეფტსა და ინგრედიენტს დაფასოებული სახით მივაწვდით.
მსოფლიოში ამ ტიპის მომსახურების რა ანალოგებიც არსებობს კონკრეტული ვახშმისთვის ერთი თვით, ან 10 დღით წინასწარ დაგეგმვას გულისხმობს. ზოგადად გვსურს, რომ ეს მიმართულებაც დავნერგოთ და ავამუშავოთ. თუმცა, ქართული ბაზრის რეალობიდან გამომდინარე, ვადა მაქსიმალურად შევამცირეთ და მიზნად გვაქვს 1 დღის ვადაში მივაწოდოთ სასურველი პროდუქტები.„ - აცხადებს კომპანიის თანადამფუძნებელი ირაკლი ხუნდაძე
პროექტი, რომლის საინვესტიციო ბიუჯეტი 50 000 ლარს შეადგენს, სამომავლოდ კიდევ სხვა სიახლეების დამატებას გეგმავს.
„სექტემბრის თვის ბოლოსთვის ტრადიციული ქართული კერძების დამატება იგეგმება. ამ დროისთვის ჩვენი უცხოური კომბინირებული სამზარეულო კერძების 7 ძირითად მიმართულებას მოიცავს, რომელშიც დაახლოებით 5-6 კერძია. ეს მენიუ მუდმივად განახლებადია და ყოველთვიურად დაახლოებით 2-3 ახალი კერძი დაემატება.
ჩვენ ვთავაზობთ მომხმარებელს „შენEAT“ რაც გულისხმობს გააკეთე შენით, თუმცა ასევე გვექნება „ჩვენEAT“, რომელიც ორიენტირებული ივენთებზე იქნება. მრგვალ ბაღთან მომიჯნავე ტერიტორია გვაქვს, სადაც ივენთები განხორციელდება. მაგალითად, 2-3 კვირაში ერთხელ იქნება არგენტილური ასადოს დღე და სოც.მედიის საშუალებით საშვები გაიყიდება. მყიდველს კი ორგანული ღვინითა და ბარბექიუს მენიუთი გაჯერებული Full Table დახვდება.“ - განმარტავს ირაკლი ხუნდაძე
როგორც კომპანიაში აცხადებენ, ამ ეტაპზე ქართულ ბაზარზე მათი ანალოგი არ არსებობს, თუმცა შესაძლო კონკურენციას მიესალმებიან და ამით პროდუქტისა და ზოგადად ბაზრის დახვეწას იმედოვნებენ.
ანი ცარციძე