გაეროს სპეციალიზებული სააგენტოს „საერთაშორისო სატელეკომუნიკაციო კავშირის“ (ITU) მონაცემების თანახმად, მობილურ ტელეფონს  10 წელზე უფროსი ასაკის მსოფლიოს მოსახლეობის თითქმის ორ მესამედი (5.2 მლრდ-ზე მეტი) ფლობს. ამავდროულად, ენერგეტიკის საერთაშორისო სააგენტოს (IEA) შეფასებით, დაახლოებით 1,3 მილიარდ ადამიანს ჯერ კიდევ არ აქვს ელექტროენერგიაზე წვდომა.

ITU-ს მონაცემების თანახმად, მობილური ტელეფონების მფლობელთა ყველაზე დიდი წილი ევროპაშია რეგისტრირებული - 93%, აფრიკაში კი ეს მაჩვენებლები ყველაზე დაბალია - 61%.

„მობილური ტელეფონები ინტერნეტით სარგებლობის ყველაზე გავრცელებული ინსტრუმენტია. მათ მფლობელთა წილი მიუთითებს ინტერნეტის ხელმისაწვდომობაზე“, - ნათქვამია შეტყობინებაში. 

ITU-ს მონაცემებით, მსოფლიოში ახალგაზრდების 75%-ს აქვს ინტერნეტი, 2021 წელს ეს მაჩვენებელი 72%-ი იყო.

ITU-ს განცხადებით, ინტერნეტი გახდა უფრო ხელმისაწვდომი მსოფლიოს ყველა რეგიონში და სხვადასხვა შემოსავლის დონის მქონე ჯგუფებში, მაგრამ განაწილება ჯერ კიდევ არათანაბარია.

”ინტერნეტ ხელმისაწვდომობა იზრდება, მაგრამ არა ისე სწრაფად და თანაბრად მთელ მსოფლიოში, როგორც ეს უნდა იყოს, ძალიან ბევრი ადამიანი კვლავ ციფრულ სიბნელეში ცხოვრობს. ჩვენი გლობალური გამოწვევა არის რესურსების ისე განთავსება, რომელიც საშუალებას მისცემს ყველას ისარგებლოს ქსელის წვდომით“,  - აცხადებს ITU-ს  გენერალური მდივანი დორინ ბოგდან-მარტინი.