ბოლო პერიოდში, ქართველ ფერმერებს შორის ლურჯი მოცვი განსაკუთრებული პოპულარობით სარგებლობს. ცხადია, მიზეზი ლურჯი მოცვის გასაყიდი ფასი და ევროპულ ბაზარზე მოთხოვნაა. თუმცა, დამწყებ ფერმერთა დიდი ნაწილი ამ კულტურის შესახებ წინასწარ ინფორმაციას არ აგროვებს და სასურველ შედეგსაც ამიტომ ვერ იღებს.
„აგრო სოლუშენს ჯგუფში“ ამბობენ, რომ იკვეთება ოთხი ძირითადი შეცდომა, რომელთა გამოც ფერმერები ლურჯი მოცვის მოსავალს ვერ იღებენ.
სწორი ჯიშების შერჩევა
საქართველოში არ არსებობს კვლევითი ორგანიზაციები, რომელთაც შეუძლიათ ფერმერებს ურჩიონ, კლიმატური პირობებიდან, ან ნიადაგიდან გამომდინარე, რა ტერიტორიაზე რომელი ჯიშის მოცვი დარგონ. ხშირ შემთხვევაში, ჯიშების შეუსაბამობის გამო, ფერმერებს მოსავლის დიდი ნაწილი ულპებათ და შედეგს ვერ იღებენ. ამიტომ, ზოგიერთმა აგრობიზნესმენმა განსხვავებულ სტრატეგიას მიმართა და ერთ ტერიტორიაზე სხვადასხვა ჯიშის ლურჯი მოცვი დარგო.
ასეთ დროს კიდევ ერთი პრობლემა იჩენს თავს - ერთ ტერიტორიაზე სხვადასხვა ჯიშის კულტურის მართვა რთულია, რადგან საჭიროა სხვადასხვა ტიპის სასუქი, მცენარეს უჩნდება სხვადასხვა ტიპის დაავადება და მათთან ბრძოლაც სხვადასხვა მეთოდითაა საჭირო. ამიტომ, პროცესი ქაოსურად მიდის და შედეგს არ იძლევა. „აგრო სოლუშენს ჯგუფში“ ამბობენ, რომ სხვადასხვა ჯიშის მოცვი ფერმერმა მხოლოდ იმ შემთხვევაში უნდა დარგოს, თუ ამისათვის ძალიან დიდი ტერიტორია აქვს გამოყოფილი.
სწორი საირიგაციო სისტემა
ცხადია, ნებისმიერი პლანტაციისთვის საირიგაციო სისტემა აუცილებელია. ამას ყველა ფერმერი ითვალისწინებს, თუმცა იშვიათად აქცევენ ყურადღებას სწორ ინჟინერიას. შედეგად, პლანტაციას წყალი ყოფნის მხოლოდ პირველი ორი წლის განმავლობაში. შემდეგ კი საჭირო ხდება სისტემის ახლებურად გაკეთება, რაც ჰექტარზე 3-4 ათასი დოლარის ხარჯია. გამოდის, რომ, დაშვებული შეცდომის გამო, ფერმერს ბაღის თვითღირებულება რამდენჯერმე ეზრდება.
მოსავლის აღება
თუ ფერმერმა მოახერხა და ლურჯი მოცვის პლანტაციას სწორად მოუარა, მოსავლის აღებისას კიდევ ერთი გამოწვევის წინაშე დგება. ლურჯი მოცვის მოსავლის აღების პერიოდი მაისის ბოლო და ივნისის დასაწყისია. ამ სეზონზე დასავლეთ საქართველოს საკმაოდ ძლიერი წვიმები ახასიათებს. შედეგად, კრეფის დროს ნაყოფი ლპება და სკდება. საბოლოოდ კი, დაახლოებით 30% იკარგება.
„აგრო სოლუშენს ჯგუფის“ კონსულტანტების თქმით, გამოსავალი მოცვის სათბურებია. ბოლო პერიოდში, ხელმისაწვდომი გახდა ლურჯი მოცვის სპეციალიზებული სათბურები, რომელთა გამოყენებაც შეიძლება როგორც მზისგან, ისე ნაყოფის წვიმისგან დაცვისთვის. აგრო კონსულტანტები ამბობენ, რომ ფერმერები სათბურებზე უარს ფინანსების გამო ამბობენ. რეალურად კი, ამ სათბურების გარეშე, მეტ ზარალს იღებენ.
აუცილებელი ინფრასტრუქტურა
მოსავლის მიღების შემდეგ, რეალიზაციის დრო დგება. თუმცა, ნებისმიერ ფერმერს მაინც უწევს, რეალიზაციამდე 1-2 კვირის განმავლობაში მოსავლის დაყოვნება. იმისათვის, რომ ლურჯი მოცვის ყველა სასარგებლო თვისება შევინარჩუნოთ, აუცილებელია საჭირო ინფრასტრუქტურის არსებობა. საქართველოში თითქმის არ არსებობს პირველადი დამუშავების ცენტრები და სამაცივრე მეურნეობები. ამის გარეშე კი აგრო ბიზნესმენები მოსავლის დიდ წილს კარგავენ.