შპს „მოცვმა“ წელს ექსპორტზე 105 ტონამდე მოცვი გაიტანა, საიდანაც 50%-ზე მეტი რუსეთზე მოდის. როგორც კომპანიის დამფუძნებელმა ზვიად მირიანაშვილმა „ბიზნესპრესნიუსთან“ საუბრისას განაცხადა, წელს მათი პროდუქცია ასევე გავიდა ევროპის და ახლო აღმოსავლეთის მიმართულებით.
შეგახსენებთ, რომ გასულ წლებში კომპანიას მოცვის 90% რუსეთში გაჰქონდა.
რაც შეეხება გადმორიცხვებს, ზვიად მირიანაშვილის თქმით, ამ მიმართულებით შეფერხება არ ყოფილა, რადგან რუსეთის მხარეს გარკვეული ვადები ჰქონდა მიცემული.
ცნობისთვის, ქართული მაყვლის, ჟოლოსა და მარწყვის მწარმოებლებმა წელს პროდუქცია რუსეთში სწორედ გადმორიცხვებთან დაკავშირებული პრობლემების გამო ვერ შეძლეს.
„ჩვენ უკვე დავასრულეთ სეზონი, მოვრჩით როგორც მოსავლის აღებას, ესე ექსპორტს. წელს უცხოეთში დაახლოებით, 105 ტონამდე მოცვი გავიტანეთ. სულ ვაწარმოეთ 115 ტონა, დარჩენილი 10 ტონის რეალიზაცია კი ადგილობრივი ბაზარზე მოხდა.
რაც შეეხება საექსპორტო ბაზრებს, წელს ჩვენი პროდუქცია გავიტანეთ, როგორც ევროპის და ახლო აღმოსავლეთის, ისე რუსეთის მიმართულებით. ექსპორტირებული პროდუქტის 50%-ზე მეტი სწორედ რუსეთში გავიდა.
აღნიშნულ ქვეყანასთან გადმორიცხვებთან დაკავშირებით პრობლემა არ შეგვქმნია. იმიტომ, რომ ჩვენ პირობებით ვყიდით მოცვს და გარკვეული დრო გვქონდა მიცემული რუსეთის მხარისთვის. შესაბამისად, შეფერხება არ ყოფილა.
წინა წლებს რომ შევადაროთ, საერთაშორისო ბაზარზე ფასი მეტ-ნაკლებად სტაბილური იყო, შარშანდელთან შედარებით ცოტა შემცირებული, შარშანწინდელთან შედარებით კი, ცოტა გაზრდილი იყო. საერთო ჯამში, ფასი ბოლო 3 წლის განმავლობაში სტაბილურია“,- განაცხადა ზვიად მირიანაშვილმა.
წყარო: bpn.ge