Moet Hennessy, რომელიც საფრანგეთის რეგიონ შამპანში ამავე სახელწოდების ცქრიალა ღვინის, ანუ შამპანურის წარმოებას ფლობს, რუსეთში პროდუქციის ექსპორტს დროებით წყვეტს – რუსეთში მიღებული ახალი კანონის მიხედვით, მას ეტიკეტების გამოცვლა უწევს.

კერძოდ, საუბარია 23 ივნისს რუსეთის სახელმწიფო სათათბიროს მიერ მიღებულ კანონზე, რომელიც მცნება „შამპანურის“ უფლებას მხოლოდ რუს მწარმოებლებს ანიჭებს, ხოლო დანარჩენები, მათ შორის ამ სასმელის სამშობლოში დამზადებული პროდუქციის ეტიკეტზე უნდა იყოს მითითებული „ცქრიალა ღვინო“.

რუსეთის ალკოჰოლის ბაზრის კვლევის ცენტრის შეფასებით, რუსეთს უცხოეთიდან წელიწადში საშუალოდ 50 მლნ. ლიტრი შამპანური შეაქვს, Moet Hennessy–ზე ამ მოცულობის მხოლოდ 2% მოდის.

ფრანგი მწარმოებლის ინფორმაციით, რუსეთისთვის განკუთვნილ ბოთლებზე მიეწერება „ცქრიალა ღვინო“, რის გამოც ექსპორტი ქვეყანაში დროებით შეწყდება და ეტიკეტების შეცვლის შემდეგ კვლავ აღდგება.

კანონის თანახმად, ახალი წესების მიხედვით, უცხოური ცქრიალა ღვინოების მწარმოებლებს დამატებითი სერტიფიკატების მიღება მოუწევთ, რასაც გარკვეული დრო და ლაბორატორიული კვლევები დასჭირდება.  იმპორტიორების ინფორმაციით, განახლებული სერტიფიკატების მიღებას რამდენიმე ათეული მილიონი რუბლი დასჭირდება, თუმცა, ეს ერთჯერადი ხარჯი იქნება.

რუსი რითეილერები მიიჩნევენ, რომ საბოლოო ჯამში, ეს რეგულაცია შამპანურის ბაზარზე მდგომარეობას მხოლოდ დროებით შეცვლის, რადგანაც რაც არ უნდა შეუცვალონ სახელი, ყველა მომხმარებელმა იცის, რომ Moet Hennessy არის ნამდვილი შამპანური, მაშინაც კი, როდესაც ეტიკეტზე სხვა რამე წერია – მით უმეტეს, როდესაც „შამპანური“ მხოლოდ რუსული პროდუქტი იქნება, რომლის ხარისხი ფრანგულს ვერც კი შეედრება.

მოსკოველი რესტორატორი სერგეი მირონოვი თვლის, რომ შექმნილი ვითარება რესტორნების ღვინის ასორტიმენტს დროებით შეცვლის, თუმცა, ისიც ეთანხმება მოსაზრებას, რომ საბოლოო ჯამში Moet Hennessy–ის ბრენდის მაღალი რეპუტაცია არსად დაიკარგება, და რუსულ შამპანურს კონკურენციას ადვილად მოუგებს.

„რუსული ცქრიალა ღვინოების დიდი პატივისცემის მიუხედავად, Moet&Chandon–ის და  Ruinart–ის  მოხმარებელს ვერანაირად ვერ ჩაანაცვლებს. კარგი რესტორანი ვალდებულია ასორტიმენტში ეს ღვინოები ჰქონდეს“, – ამბობს ის.

rbc.ru