საბანკო სექტორისთვის გადასახადების გაზრდა საბანკო პროდუქტების ზრდას გამოიწვევს — როგორც „კომერსანტთან“ ეკონომისტმა სოსო ბერიკაშვილმა განაცხადა, გადასახადის ზრდა მთავრობას მხოლოდ რეფერენდუმის გზით შეუძლია, თუმცა არსებობს გამონაკლისი და ზრდა მხოლოდ 3 წლითაა შესაძლებელი. ეკონომისტი მიიჩნევს, რომ მთავრობის გადაწყვეტილება უფრო პოლიტიკურია, ვიდრე ეკონომიკური და მას იმავდროულად, საპროცენტო განაკვეთების ზრდის რისკიც ახლავს.
„ეს უფრო პოპულისტური განცხადებაა, ვითომ ბანკებს მაღალი მოგება აქვთ და ეს მაღალი მოგება არ უნდა ჰქონდეთ. არავის დაუნიშნავს პრემიერი იმისთვის, რომ მოგების ნორმები აკონტროლოს, ეს ერთი. მეორე, გადასახადის გაზრდის უფლება არ აქვს არავის, საქართველოს ორგანული კანონით „ეკონომიკური თავისუფლების შესახებ“. ეს შესაძლებელია გამონაკლის, დროებით ნორმად, 3 წლის ვადით. სხვა შემთხვევაში გადასახადები, რომ გაიზარდოს რეფერენდუმი უნდა ჩაატაროს და ხალხს უნდა კითხონ, გადასახადები გავზარდოთ თუ არაო. ამ პროპაგანდის შემდეგ შესაძლოა ხალხი მაგას დაეთანხმოს, მაგრამ ყოველ შემთხვევაში პროცედურა ასეთია.
ახლა რაც შეეხება ეფექტს, გადასახადს უზრდიან და ეს იმას ხომ არ ნიშნავს, რომ ბანკი მაგის გამო მოიკლებს, ან უნდა მოიკლოს მოგება. ის ამოიღებს ამ მოგებას ისევ იქიდან, საიდანაც იღებდა - მოკლედ, საპროცენტო განაკვეთების გაზრდით. ამ ყველაფრიდან გამომდინარე საპროცენტო განაკვეთის ზრდა მოსალოდნელია და ეს პოპულიზმი დარჩება პოპულიზმად“, - განაცხადა სოსო ბერიკაშვილმა.
ეკონომისტი მიიჩნევს, რომ ე.წ. ესტონური მოდელის ამოქმედება ხელსაყრელია თვითონ ბიზნესისთვის და ბიზნესის განვითარებისთვის.
„ეს იყო პოლიტიკური გადაწყვეტილება, რომ ჩვენ ბანკებს ვჩაგრავთ და კაი ტიპები ვართ. თან 2024 წელს აპირებენ ამის გაკეთებას და თან საარჩევნო წელია და ამით ისპეკულირებენ“, - აცხადებს ეკონომისტი.
შეგახსენებთ, დღეს პრემიერ-მინისტრმა განაცხადა, რომ ბანკები და საფინანსო სექტორი მოგების გადასახადების ე.წ ესტონურ მოდელზე აღარ გადადიან, შენარჩუნდება მოგების გადასახადის არსებული სისტემა და 15%-ის ნაცვლად 20%-ს გადაიხდიან. პრემიერ-მინისტრის თქმით, ბანკების სუფთა მოგება წლის ბოლოსთვის 2 მილიარდი ლარი იქნება, რაც გაუმართლებელია. ირაკლი ღარიბაშვილმა აღნიშნა, რომ ამ გადაწყვეტილებით მთავრობა 2024 წლიდან დამატებითი შემოსავლის მიღებას ვარაუდობს.