„ძალიან ძვირი დაჯდა პროდუქტის წარმოება და მივედით იქამდე, რომ მეორე მხრივ, გასაღების მთელი რიგი პრობლემები დახვდა ფერმერებს“,-ამის შესახებ ფერმერთა ასოციაციის თავმჯდომარის მოადგილემ რატი კოჭლამაზაშვილმა რადიო „პალიტრისა“ და პალიტრანიუსის“ გადაცემაში „საქმე“ განაცხადა.
მისი თქმით, კოვიდპანდემიის შემდეგ, უკრაინაში ომმა არაორდინალური ვითარება შექმნა, რაც ქართველ ფერმერებზეც ნეგატიურად აისახა. როგორც რატი კოჭლამაზაშვილმა განმარტა, გაძვირდა პროდუქტის წარმოება, საბოლოოდ კი იქამდე მივიდა საქმე, რომ ფერმერს პროდუქტის გაჩუქება უფრო იაფი უჯდება, ვიდრე მისი მოკრეფა.
ცნობისთვის, ზაფხულის განმავლობაში, არაერთმა ფერმერმა განაცხადა, რომ საკუთარ პროდუქტს უსასყიდლოდ გაატანდა მოკრეფის მსურველს.
„ნამდვილად არაორდინალური სიტუაციაა, კოვიდ კრიზისიდან, გადმოვინაცვლეთ უკვე უკრაინის კრიზისზე, რაც დღეს ისევ გრძელდება, სამწუხაროდ. როდესაც საქმე ეხება არა მხოლოდ პროდუქტების გასაღებას, ექსპორტს, ან თუნდაც იმპორტს, აქ საქმე გვაქვს იგივე, აგროსაშუალებებთან, იქნება ეს შხამქიმიკატები, თუ სასუქი მასალები, შემოდიოდა ამ ორი ქვეყნიდან. შესაბამისად, ის ომი, რაც მიმდინარეობს უკრაინაში, ძალიან აისახა ქართველ ფერმერზე. სანამ გასაღებამდე მივალთ, პირველი და უმთავრესი ეს გახლდათ წარმოების ხარჯების გაზრდა. მოგეხსენებათ, რომ ფასები კატასტროფულად გაიზარდა, მათ შორის, აგროსაშუალებებზე. დაწყებული შხამქიმიკატებით, დიზელის საწვავი, რომელიც ასევ ძალიან მნიშვნელოვანია, სასუქი, ადამიანური კაპიტალი, რომელიც საკმაოდ დეფიციტური ხდება, არამარტო ძვირია, მისი პოვნაც კი საკმაოდ რთულია. განსაკუთრებით, მოსავლის აღების სეზონზე.
აქედან გამომდინარე, ერთის მხრივ, ძალიან ძვირი დაჯდა პროდუქტის წარმოება და მივედით იქამდე, რომ მეორე მხრივ, გასაღების მთელი რიგი პრობლემები დახვდა ფერმერებს.
რაც შეეხება შემნახველ და გადამამუშავებელ საწარმოებს, საკმაოდ ბევრი გაიხსნა ბოლო წლებში, თუმცა, არ უნდა დაგვავიწყდეს ისიც, რომ წარმოებაც გაიზარდა. მოგეხსენებათ, ძალიან ბევრი პროექტია, მათ შორის, ახალი ჯიშები, რომელიც სწორედ ამაზეა გავლილი, რომ რაღაც გარკვეული პერიოდი დავასაწყობოთ, ამიტომ, ის რაოდენობა რაც არსებობს, არ არის საკმარისი. ამიტომ ხდება ის, რაც ხდება, სამწუხაროდ.
ამ მიმართულებით მეორე პრობლემა, რამაც იჩინა თავი, ეს არის ფასის კორექცია. მოგეხსენებათ, ლარის გამყარება ევროსთან, დოლართან მიმართებით, ხელს უშლის ექსპორტს, ის კულტურები, რომელზეც არის საუბარი, მაგალითად, ყურძენი, ვაშლატამა, ძირითადად ექსპორტზეა ორიენტირებული. აქედან, გამომდინარე, ერთის მხრივ, გამოდის, რომ ფასი შემცირდა, შესაბამისად, იგივე სასაწყობოებში ვერ იხდიან მაღალ ფასს და გამოდის, რომ საბოლოოდ მაინც ფერმერამდე დადის ის დაბალი ფასი, სწორედ მისთვის, მოკრეფა უფრო ძვირი ჯდება, ვიდრე გაჩუქება“,- განაცხადა რატი კოჭლამაზაშვილმა.