უკრაინისა და საფრანგეთის პრეზიდენტებს შორის მოლაპარაკება დასრულდა. ერთობლივ პრესკონფერენციაზე ვოლოდიმირ ზელენსკიმ ემანუელ მაკრონს ევროკავშირის ძალისხმევისთვის დონბასში სიტუაციის დარეგულირებისა და უკრაინის ეკონომიკური დახმარებისთვის მადლობა გადაუხადა.
“ჩვენ ვიზიარებთ პრეზიდენტ მაკრონის ხედვას უკრაინის, ევროპისა და მთლიანად მსოფლიოს უსაფრთხოებისთვის არსებული საფრთხეებისა და გამოწვევების შესახებ”, - განაცხადა ზელენსკიმ.
უკრაინის პრეზიდენტი გამოეხმაურა ვლადიმერ პუტინის დამამცირებელ გამონათქვამს მინსკის შეთანხმების შესახებ. “მოგწონს, თუ არა, აიტანე, ჩემო ლამაზო. შესრულება საჭიროა, სხვანაირად არ გამოვა”, - განაცხადა პუტინმა. "არის რაღაცეები, რაზე კამათიც არ შეიძლება - უკრაინა მართლაც მშვენიერია, "ჩემის" შესახებ კი - მეჩვენება, რომ ეს უკვე ზედმეტია", - განაცხადა ზელენსკიმ.
"უკრაინა მომთმენია და ვფიქრობ, ეს სიბრძნეა. ეს მნიშვნელოვანია მთელი ევროპისთვის და რუსებისთვის. ესკალაცია დამოკიდებულია ჩვენს მოთმინებაზე. ესკალაცია მეორე მხრიდან მოდის. მეორე მხრივ, ჩვენ ვიცავთ ჩვენს ქვეყანას, ჩვენს ტერიტორიაზე ვართ. ჩვენი მოთმინება გავლენას ახდენს პროვოკაციებზე, როცა მათ არ ვპასუხობთ, მაგრამ ღირსეულად ვიქცევით. ასე რომ, მოთმინება, ჩემი აზრით, სიბრძნეა”, - განაცხადა ზელენსკიმ პუტინის საპასუხოდ.
ემანუელ მაკრონმა პუტინთან მრავალსაათიან დისკუსიაზე საუბრისას აღნიშნა, რომ რუსეთის პრეზიდენტი ცდილობდა დაერწმუნებინა თითქოს, “ის არ იყო ესკალაციის ინიციატორი, არამედ მხოლოდ რეაგირებას ახდენდა”, ხოლო ბელარუსში არსებულ ვითარება და იქ სამხედრო წარმომადგენლობის გაზრდა “ზეწოლითა და დაძაბულობით” გაამართლა.
საფრანგეთის პრეზიდენტმა ხაზგასმით აღნიშნა, რომ რუსეთი ახორციელებს ზეწოლას უკრაინაზე, ემუქრება ახალი სამხედრო მანევრებით და აგროვებს ჯარებს საზღვრებზე. თუმცა, რუსეთის ფედერაციის ზეწოლის მიუხედავად, კონფლიქტის მოგვარების პროცესი უნდა გაგრძელდეს.
ემანუელ მაკრონმა განაცხადა, რომ ზად არის, გერმანიასთან ერთად გააგრძელოს მუშაობა სიტუაციის დეესკალაციისთვის. მისი განცხადებით, შეხვედრაზე პრეზიდენტმა ზელენსკიმ დაადასტურა მზადყოფნა, იმუშაოს მინსკის შეთანხმებების შესრულებაზე. მაკრონმა შეთანხმებებს უკრაინის ტერიტორიული მთლიანობისა და სუვერენიტეტის დაცვის მოქმედი ინსტრუმენტი უწოდა.
“ახლა გვაქვს მოლაპარაკებების წინსვლის შესაძლებლობა”, - განაცხადა მაკრონმა და აღნიშნა, რომ უახლოეს კვირებში შესაძლებელი იქნება მინსკის შეთანხმებებში “განმარტებების გაკეთება, რომლებიც შეუსაბამობებს აღმოფხვრის”.
მინსკის შეთანხმებების კომპლექტს ხელი 2014 და 2015 წლებში უკრაინის, რუსეთის, საფრანგეთისა და გერმანიის ლიდერებმა რუსეთის მიერ ყირიმის ანექსიის შემდეგ მოაწერეს. მისი მიზანი უკრაინის აღმოსავლეთ რეგიონებში ომის დასრულება იყო. მინსკის პროტოკოლის საფუძველზე, შეიქმნა ე.წ. რუხი ზონა მხარეებს შორის და განისაზღვრა, თუ რა იარაღის ტიპების განლაგებაა შესაძლებელი აღნიშნულ ტერიტორიაზე, თუმცა, შეთანხმება არაერთხელ დაირღვა და სამხედრო მოქმედებების შეჩერება ვერ მოხერხდა. შეთანხმების პუნქტებს ვოლოდიმირ ზელენსკის მთავრობა ნეგატიურად აფასებს.
მაკრონმა დაადასტურა, რომ ნორმანდიული ფორმატის ლიდერების მრჩეველთა შემდეგი შეხვედრა ხუთშაბათს, 10 თებერვალს გაიმართება.
Businessformula.ge