„აპარტოტელების მხრიდან იყო მოლოდინი, რომ ბაკურიანის ჩემპიონატის დროს სრული დატვირთვით იმუშავებდნენ და ადგილი აღარ ექნებოდათ, შესაბამისად ფასიც მაღალი იყო, თუმცა ეს ასე არ მოხდა“, - ამის შესახებ „კომერსანტს“ საქართველოს მთის კურორტების ბიზნეს ასოციაციის პრეზიდენტმა და „დაიცავი მთის კურორტების“ დამფუძნებელმა გეგა სალუქვაძემ განუცხადა. სალუქვაძის თქმით, მიუხედავად იმისა, რომ ჩემპიონატი კარგად მიმდინარეობს, დამსვენებლების ნაკლებობა მაინც შეინიშნება, რისი მიზეზიც შესაძლოა არასტაბილურობა და სეზონის დასაწყისში ნაკლები თოვლი გახდა.
„მიუხედავად ჩემპიონატისა, დამსვენებლების ნაკლებობაა. ეს მარტო ბაკურიანს არ ეხება, ზოგადად იმდენად არასტაბილურად დაიწყო სეზონი და იმდენად უნალექობა იყო, რომ იმ რაოდენობის დამსვენებელი, რასაც ბაკურიანი და გუდაური მიჩვეულია, წელს არ ჩამოსულა. თუმცა ჩემპიონატს ბევრი უცხოელი ესწრება და ყველაფერი ძალიან კარგად და მაღალ დონეზე მიმდინარეობს.
ზოგადად კურორტებზე მცირე ბიზნესების პრობლემა ქაოტური მშენებლობებია, ძალიან ბევრი ობიექტია და რა თქმა უნდა, არაფრის მოთხოვნა-მიწოდება არ იზომება. ჩვენ სულ ვიძახით, რომ უნდა ტარდებოდეს კვლევა, თუ დავინახავთ, რომ ტურისტების და დამსვენებლების რაოდენობა იზრდება, მხოლოდ ამის შემდეგ უნდა გაიცეს ობიექტის მშენებლობის ნებართვა, ასეთია მსოფლიო პრაქტიკა,“ - აღნიშნა გეგა სალუქვაძემ.
სალუქვაძის თქმით, ჩემპიონატის მიზანია, რომ ქვეყანამ სათხილამურო რუკაზე თავი დაიმკვიდროს და მსგავსმა ღონისძიებებმა ქვეყანას პოპულარიზაცია მოუტანოს, თუმცა მისივე თქმით. როდესაც ტურისტი ჩამოვა მას ქაოსი აღარ უნდა დახვდეს, რომ მეორედ ჩამოსვლა მოუნდეს.
„უცხოელი ტურისტი, რომ ჩამოდის და აქ ასეთ ქაოსს ხედავს, მეორედ აღარ დაბრუნდება, ჩვენთვის ჩემპიონატი მნიშვნელოვანია იმ კუთხით. რომ მსოფლიო რუკაზე საქართველომ. როგორც სათხილამურო ქვეყანამ ისე დაიმკვიდროს თავი, ამ კუთხით ქვეყნის პოპულარიზაცია შთამბეჭდავია, ყველაფერი მიმზიდველი და მომხიბვლელია, მაგრამ როდესაც ამ პიარის შემდეგ ტურისტი საქართველოში ჩამოვა და ამ ქაოსს ნახავს, აღარ მგონია, რომ მეორედ ჩამოსვლა მოუნდეს,“ - აღნიშნა გეგა სალუქვაძემ.
თაკო კვაჭანტირაძე