საქართველოში კორონავირუსით ინფიცირების დღიურმა მაჩვენებელმა ახალ პიკს მიაღწია. ბოლო 24 საათში ქვეყანაში კორონავირუსის 17 484 ახალი შემთხვევა დადასტურდა. ჯანდაცვის მინისტრი ამბობს, რომ „ომიკრონი“ თავისი მიმდინარეობით სეზონურ გრიპს დაემსგავსება, თუმცა ფაქტია, სამედიცინო სექტორზე დატვირთვა დღითიდღე იზრდება. გამონაკლისი არც სადაზღვევო სფეროა. „კომერსანტი“ დაინტერესდა, როგორ მოქმედებს მნიშვნელოვნად გაზრდილი ინფიცირების მაჩვენებელი ჯანმრთელობის დაზღვევაზე, გაიზარდა თუ არა გაცემული პოლისების რაოდენობა და როგორია სექტორის ფინანსური მაჩვენებლები.
„ჯიპიაი ჰოლდინგი“-ს საზოგადოებასთან ურთიერთობის მენეჯერი თამთა ყიფიანი აცხადებს, რომ ასეთი მაღალი მომართვიანობა არცერთი შტამის დროს დაფიქსირებულა. მისი თქმით, კომპანია ყოველდღიურად ამატებს ოჯახის ექიმებს, რათა ყველა დაზღვეულის მომსახურება შეძლონ.
„დაზღვეულების მომართვიანობა საგრძნობლადაა გაზრდილი, ასეთი მაღალი დონე არცერთი ტალღის დროს არ დაფიქსირებულა. ახალი შტამის გავრცელების ფონზე დაზღვეულთა მომართვიანობა სამჯერ და მეტჯერ გაიზარდა. აქედან გამომდინარე რესურსები გავაორმაგეთ როგორც ქოლცენტრში, ისე სხვა მომსახურების მიმართულებით. ომიკრონის სიმპტომები კორონავირუსის სხვა შტამებთან შედარებით იმდენად მარტივია, რომ შეიძლება ოჯახის ექიმის ერთი ზარიც საკმარისი აღმოჩნდეს მკურნალობის დროს. მიუხედავად იმისა, რომ რესურსები გავაორმაგეთ, ვცდილობთ რომ ყველას მოვემსახუროთ, თუმცა ბევრი ადამიანი ვერ ახერხებს დაკავშირებას, ამიტომ დავამატეთ პორტალი და ფეისბუქის მესენჯერით ვცდილობთ მივწვდეთ ამ ადამიანებს. მოლოდინი გვაქვს, რომ პიკური პერიოდი გადაივლის და მდგომარეობა უკეთესობისკენ შეიცვლება“, - განაცხადა თამთა ყიფიანმა.
თამთა ყიფიანი გვიყვება, რომ კორონავირუსით გამოწვეული პანდემიის პერიოდში ადამიანები მიხვდნენ, რომ მათ ჯანმრთელობის დაზღვევა სჭირდება, ამიტომ, მისი თქმით, როგორც კორპორაციულ ისე ინდივიდუალურ სეგმენტში გაყიდვები მცირედით გაიზარდა.
„პანდემიის დასაწყისში, ჯანმრთელობის დაზღვევაში მომგებიანობა გაიზარდა, რადგან ადამიანები გარეთ არ გადიოდნენ, შესაბამისად დაზღვევას არავინ იყენებდა. როგორც კი შეზღუდვები მოიხსნა, დაზღვევის გამოყენება მაქსიმალურად დაიწყეს. შეგვიძლია ვთქვათ, რომ ზარალიანობა რამდენიმე მილიონით გაიზარდა. ამ სეგმენტში ჯერ-ჯერობით ვითარება არ დასტაბილურდება, რადგან პოსტკოვიდურ გამოკვლევებს ბევრი ადამიანი იტარებს და ზარალიანობის ტენდენცია კიდევ გაგრძელდება, მაგრამ იმედს ვიტოვებთ, რომ ომიკრონის შტამი პანდემიის დასასრულის დასაწყისი აღმოჩნდება“, - ამბობს „ჯიპიაი ჰოლდინგი“-ს საზოგადოებასთან ურთიერთობის მენეჯერი.
ჯანმრთელობის დაზღვევაში ზარალიანობა რომ გაზრდილია, ადასტურებს „არდის“ გენერალური დირექტორი მიხეილ ჯაფარიძე. მისი თქმით,ზარალიანობა გაზრდილია ერთის მხრივ ინფლაციის და მეორე მხრივ კოვიდის მართვის მხარდაჭერაში გაღებული პირდაპირი თუ ირიბი ადმინისტრაციული დანახარჯების ზრდის გამო. მიხეილ ჯაფარიძე ამბობს იმასაც, რომ ანალოგიურ პერიოდთან შედარებით გაცემული პოლისების რაოდენობა 9-10%-ით გაიზარდა.
„ჯანმრთელობის დაზღვევაზე მოთხოვნა სტაბილურია და მცირედით მზარდიც კი. მნიშვნელოვანი გამოწვევაა პანდემიის გამო პირველადი ჯანდაცვის რგოლის სერვისების დროულად მიწოდება დაზღვეულებისთვის, რადგან შემთხვევების მატების გამო არის მომსახურების მიწოდებაზე ძალიან დიდი დატვირთვა. გამომდინარე იქიდან, რომ მოლოდინი მხოლოდ პესიმისტურია, ველოდებით სისტემის კიდევ უფრო მეტ გადატვირთვას, რაც უკიდურესად საყურადღებოა, რათა არ მოხდეს მომიჯნავე სერვისების პარალიზება“, - განაცხადა მიხეილ ჯაფარიძემ.
ბაჩო ადამია