საქართველოს მთავრობამ 2022 წლის ბიუჯეტის პროექტის გადამუშავებული ვერსია წარმოადგინა, რომლის მიხედვითაც, მომავალ წელს ხელისუფლება 4.348 მლრდ ლარის ვალის აღებას გეგმავს. უნდა აღინიშნოს, რომ აღნიშნული ვალის მოცულობა ქვეყნის მთავარი ფინანსური დოკუმენტის პროექტის პირველ ვარიანტთან შედარებით 55 მლნ ლარით ნაკლებია. ბიუჯეტის საწყისი პროექტის მიხედვით საქართველოს მთავრობას 4.403 მლრდ ლარის სესხი უნდა აეღო.

გადამუშავებული ბიუჯეტის პროექტის მიხედვით, მომავალ წელს მთავრობა შიდა ვალის სახით 1.3 მლრდ ლარს აიღებს. აღსანიშნავია, რომ ბიუჯეტის საწყის პროექტში სწორედ ეს მოცულობის თანხა იყო გათვალისწინებული.

დანარჩენ 3,048 მლრდ ლარის ვალს მთავრობა საგარეო სესხის სახით აიღებს. უფრო კონკრეტულად, საინვესტიციო კრედიტების მიმართულებით ხელისუფლება 1,848 მლრდ ლარის აღებას გეგმავს, რაც წინა პროექტის გეგმასთან შედარებით შემცირებულია 55 მლნ ლარით. საბიუჯეტო დახმარების სახით მისაღები კრედიტების მაჩვენებელი კი 1.2 მლრდ ლარს შეადგენს. ანუ გამოდის, რომ ახალი ვალების აღების შემცირება საინვესტიციო კრედიტების მიმართულებით ასაღები ვალდებულებების კლებამ განაპირობა.

აქვე იმასაც შეგახსენებთ, რომ 2021 წლის ბიუჯეტის შესრულების მიხედვით, 9 თვეში საქართველოს მთავრობამ უკვე 3.652 მლრდ ლარის სესხი აიღო. 2021 წლის 9 თვეში ვალდებულებების ზრდის წილობრივი მაჩვენებელი ბიუჯეტის მთლიანი შემოსულობების 28.3%-ს შეადგენს, მაშინ როცა პანდემიამდელ 2019 წელს ეს მაჩვენებელი მხოლოდ 11.4%-ს შეადგენდა.

bpn.ge