რუსი ოლიგარქი ოლეგ დერიპასკა მიიჩნევს, რომ 2024 წელს რუსეთში არსებული ეკონომიკური პოლიტიკის შედეგად, ქვეყანაში ფული აღარ იქნება“. ამის შესახებ დერიპასკამ 2 მარტს კრასნოიარსკის ეკონომიკურ ფორუმზე განაცხადა.
სახელმწიფო კაპიტალიზმი... არის გზა არსაით. მე შიშით ვუყურებ იმ რესურსებს, რომლებიც გასული წლის განმავლობაში ალბათ უსარგებლოდ დაიხარჯა. ადრე ვფიქრობდი, რომ ეს იყო მილიარდები, მაგრამ ახლა ვხედავ, რომ ანგარიში უკვე ტრილიონებს აღწევს. მხოლოდ საბაზრო ეკონომიკა, მხოლოდ კონკურენტული გარემოთი დარეგულირებული საკითხები (დაეხმარება ქვეყანას) ... მომავალ წელს ფული აღარ იქნება,- განაცხადა მსოფლიოში სიდიდით ალუმინის მესამე მწარმოებლის, RUSAL-ის ერთ-ერთმა თანამფლობელმა.
დერიპასკა აცხადებს, რომ რუსეთს უცხოელი ინვესტორები სჭირდება
უცხოელი ინვესტორი შეხედავს, როგორ შოულობს რუსი ინვესტორი, რა პირობები აქვს. თუ ჩვენ არ შევქმნით ამ პირობებს და ვერ უზრუნველვყოფთ ჩვენი ბაზრების მიმზიდველობას, მხოლოდ ვიოცნებებთ და 2033 წელს იგივე სიტყვებს ვიტყვით, - განაცხადა რუსმა ბიზნესმენმა.
10 მარტიდან, აშშ-ში ძალაში შევა რუსეთიდან ალუმინის იმპორტზე დაწესებული 200 პროცენტიანი გადასახადი, რის გამოც შესაძლოა სრულად შეჩერდეს ამერიკულ ბაზარზე რუსული ლითონის მიწოდება.
2022 წლის სექტემბერში აშშ-ის იუსტიციის დეპარტამენტმა დერიპასკა სანქციების რეჟიმის დარღვევაში დაადანაშაულა - რაც სისხლის სამართლის დანაშაულია. ბრალდების ინფორმაციით, ოლიგარქი ქვეყნის ტერიტორიაზე იყენებდა ქონებას, მისი პარტნიორი კი ორჯერ იმყოფებოდა აშშ-ში შვილების გასაჩენად. ამ საქმეზე მისი ერთ-ერთი სავარაუდო თანაშემწეც დააკავეს.
დერიპასკა რუსეთის ერთ-ერთი უმდიდრესი ადამიანია. ჟურნალმა Forbes-მა 2022 წელს მისი ქონება 1,7 მილიარდ დოლარად შეაფასა. დერიპასკამ მის წინააღმდეგ დაწესებული სანქციებით მიყენებული ზარალი 7,5 მილიარდ დოლარად შეაფასა. ის უარყოფს მის წინააღმდეგ ბრალდებებს და აშშ-ის სანქციების სიაში შეყვანა სასამართლოში გაასაჩივრა.
რუსეთი
