Galt&Taggart - ის ეკონომისტმა ლაშა ქავთარაძემ რადიო „კომერსანტის“ გადაცემაში „პროფესიონალები“ 2022 წელი შეაფასა და აღნიშნა, რომ მიმდინარე წელს იყო ისეთი პოზიტიური ეკონომიკური აქტივობა. ეკონომისტმა ხაზი გაუსვა ორნიშნა ეკონომიკურ ზრდას, მშპ - ს მიმართ ბიუჯეტის დეფიციტის შემცირებას და მთავრობის ვალის კლებას.

ლაშა ქავთარაძე წლის გამოწვევად ინფლაციას და ფასების მაღალ დონეს ასახლებს, თუმცა ქავთარაძე აღნიშნავს, რომ ინფლაცია  არა მარტო  2022 წლის, არამედ  გასული წლების  გამოწვევაც იყო.

„ინფლაციის მიზნობრივი თარგეთი 3% - ია, თუმცა რამდენიმე წელია საქართველოში ინფლაცია 3% ზე ბევრად მაღალია. არსებობს გარკვეული ჯგუფები, რომელთა ხელფასების ზრდის ტემპი ინფლაციას ვერ ეწევა და მათი მსყიდველუნარიანობა გაუარესებულია. ნომინალური ხელფასი გაზრდილია, რეალური ხელფასიც გაზრდილია, თუმცა თუ ჩვენ  შევხედავთ დაბალშემოსავლიან ჯგუფებს, რომელთა შემოსავალი 500 ლარზე დაბალია, მათ  შემოსავლებში ხელფასების ზრდა ვერ  იყო ისეთივე მაღალი, როგორიც ინფლაციაა.“, - განაცხადა ლაშა ქავთარაძემ და აღნიშნა, რომ მესამე კვარტალში უმუშევრობის  ისტორიულად  ყველაზე დაბალი მაჩვენებელი დაფიქსირდა.

რაც შეეხება მაღალი ეკონომიკური ზრდის მთავარ ფაქტორებს,  ქავთარაძე ამბობს, რომ ეკონომიკურ  აქტივობაში დადებითი წვლილი მიგრაციას ჰქონდა, რომლის გავლენაც ორ ნაწილად, პირდაპირ და  არაპირდაპირ ეფექტად იყოფა.

ლაშა  ქავთარაძე ვარაუდობს, რომ 2023 წელს ეკონომიკური აქტივობა შენელებული იქნება, თუმცა ის ქვეყნის  პოტენციურ დონეს დაუბრუნდება.

„ჩვენი მიმდინარე  პროგნოზი  4,8%,  ხოლო  მთავრობის 5%,  თუმცა მომავალი  წლისთვის ინფლაციასთან დაკავშირებით გამოწვევები კვლავ რჩება, ასევე გამოწვევა იქნება 2023 წელს იმ  გაუმჯობესებული  პარამეტრების  შენარჩუნება , რაც  2022  წელს მივიღეთ.  იქნება ეს ლარის კურსი, თუ  მთავრობის ვალი. ის რომ დღეს მთავრობის ვალი 40% ს  არ  სცდება  ამაში  დიდი  წვლილი  ლარის  გაცვლით  კურსს  აქვს“, - აღნიშნა ლაშა  ქავთარაძემ.