Hamptons & Soles მომხმარებელს ძვირფასი ჩანთების და ფეხსაცმლის რესტავრაციას და განახლებას სთავაზობს. 2018 წელს კომპანიამ ფუნქციონირება ავტოსალონების რესტავრაციით დაიწყო. როგორია სერვისის მიმართ მომხმარებლის ინტერესი და რა გამოწვევების წინაშე დგას კომპანია ამის შესახებ რადიო „კომერსანტის“ გადაცემაში „კომერსანტის დილა“ Hamptons & Soles–ის დამფუძნებელმა ირაკლი ბაღოშვილმა ისაუბრა. კომპანიის დამფუძნებლებმა ტყავის რესტავრაცია გერმანიაში შეისწავლეს და კომპანია საქართველოში შექმნეს, მათი თქმით, ასეთი სერვისი საქართველოში პირველია.
„როდესაც მუშაობა დავიწყეთ, დავინახეთ, რომ ეს ძალიან ფართო სფეროა. მომხმარებლის მოთხოვნიდან გამომდინარე გადავწყვიტეთ, რომ ჩვენი საქმიანობის არეალი გაგვეფართოებინა და ავტომობილების სალონებთან ერთად ფეხსაცმელის და ჩანთების რესტავრაციაზეც გვეზრუნა. თავიდან ეს სერვისიც ავტომობილებთან ერთად გვქონდა ცენტრში გაერთიანებული, თუმცა ჩანთებსა და ფეხსაცმელებზე მოთხოვნა იმდენად მაღალი იყო, რომ გადავწყვიტეთ გაგვეცალკევებინა და ბრენდი Hamptons & Soles დავაფუძნეთ.
ფეხსაცმლის და ჩანთის მიმართულებით ბაზარი არ შეგვისწავლია. ჩვენ კვლევა მანქანების მიმართულებით ჩავატარეთ და ძალიან დიდი ბაზარი აღმოჩნდა, თუმცა მივხვდით, რომ ჩანთების და ფეხსაცმელების რესტავრაციაც არანაკლებ მნიშვნელოვანია. მოგეხსენებათ, რომ საქართველოში ჩაცმა და ძვირფასი ნივთები ბევრ ადამიანს უყვარს. რაც შეეხება ჩვენ მომხმარებელს, მათი 90% ქალია“, - აღნიშნა ირაკლი ბაღოშვილმა.
ბაღოშვილის თქმით, კომპანიას პრემიუმ ხარისხის მასალები საფრანგეთიდან შემოაქვს. მისივე თქმით, მასალა 35%-ით ფუტკრის ცვლისგან შედგება, რაც საშუალებას იძლევა, რომ ტყავს პირვანდელი სახე დაუბრუნდეს, არ მიეკაროს წყალი და სხვადასხვა ზემოქმედებისგან დაცული იყოს.
„სხვათა შორის ნივთის მოწესრიგება ისე არის შესაძლებელი, რომ მას პირვანდელი ან პირვანდელზე უკეთესი შესახედაობა შევძინოთ. ხშირად არის შემთხვევები, როდესაც მაგალითად ფეხსაცმელს ფერი იმდენად აქვს გადასული, რომ პირვანდელი ფერის აღდგენა შეუძლებელი ხდება. შესაბამისა, მომხმარებელი ჩვენ გვენდობა. მიახლოებით ფერს გვეუბნებიან და შეიძლება 20-30% -იანი სხვაობა მივიღოთ, თუმცა მომხმარებელს შედეგი უფრო მოეწონოს“ - აღნიშნა ირაკლი ბაღოშვილმა.
ბაღოშვილის თქმით, როგორც ყველა სხვა ბიზნესს ინფლაცია კომპანია Hamptons & Soles – საც შეეხო. ბაღოშვილის თქმით, ევროპაში ნავთობის და გასის ფასის ზრდის გამო მწარმოებლებს თითქმის ყოველ თვე უწევთ პროდუქციაზე ფასების 5-10%-ით მატება, თუმცა Hamptons & Soles-ი ასეთი ტემპით მომსახურებას ვერ აძვირებს. ბაღოშვილმა ასევე აღნიშნა, რომ ბოლო წლებში მომსახურებაზე ფასების დაახლოებით 30%-იანი ზრდა მოუწიათ.
ბაღოშვილმა გადაცემაში საუბრისას კადრების დეფიციტზეც ისაუბრა და განმარტა, რომ გამომდინარე იქიდან, რომ ეს სფერო საქართველოში ახალია, კომპანიას უწევს ისეთი კადრების აყვანა, რომლებსაც შესაბამისი გამოცდილება არ აქვთ და პროფესიას ადგილზე სწავლობენ. მისივე თქმით, კომპანიაში სჭირდებათ ისეთი კადრები, რომლებსაც ვიზუალური აღქმის და ფერებზე მუშაობის კარგი უნარი აქვთ, შესაბამისად სამხატვრო აკადემიის სტუდენტებთან თანამშრომლობენ.
თაკო კვაჭანტირაძე