საარსებო მინიმუმი არის შემოსავლის მინიმალური დონე, რომელიც საჭიროა ადამიანის არსებობისა და აუცილებელი მოთხოვნების დაკმაყოფილების უზრუნველსაყოფად. ფაქტობრივად, ეს ინდიკატორი ცხოვრების ქვედა ზღვრის მაჩვენებელია.

საარსებო მინიმუმი მსოფლიოს სხვადასხვა ქვეყნებში განსხვავებულია. RankingRoyals-ის 2023 წლის მონაცემებით, ყველაზე მაღალი $3761 საარსებო მინიმუმი მონაკოშია, მეორე ადგილზე $3280-ით სინგაპური, ხოლო მესამეზე $3090-ით კაიმანის კუნძულებია.

საქართველოში საარსებო მინიმუმის დათვლა მინიმალური სასურსათო კალათის საფუძველზე ხორციელდება. საქსტატის მიერ გამოყენებული შრომისუნარიანი ასაკის მამაკაცის საარსებო მინიმუმის ღირებულების გაანგარიშების მეთოდის მიხედვით, აღნიშნული სასურსათო კალათა მოიცავს შრომისუნარიანი ასაკის მამაკაცის ნორმალური სიცოცხლისა და შრომისუნარიანობისთვის ფიზიოლოგიურად აუცილებელი საკვების რაოდენობის, მისი შემადგენელი ელემენტების და კალორიულობის მინიმალურ ოდენობას. საქართველოში მარტში საარსებო მინიმუმი შემცირდა და შრომისუნარიანი ასაკის მამაკაცისთვის მხოლოდ 256 ლარი (დაახლოებით $100) შეადგინა.