თებერვალში ეკონომიკური გუნდის წევრებმა პრემიერ-მინისტრისგან დავალება მიიღეს, რომ ფასების „რეგულირებისთვის” ახალ კანონპროექტზე ემუშავათ. თუმცა მთავრობის მცდელობას ის შედეგი არ მოაქვს, რაც წინასწარ იყო განსაზღვრული. კონკურენციის სააგენტო პრემიერის დავალებით მაღალი ფასების გამოწვეულ პრობლემებს სწავლობს, რომლის შედეგად ირკვევა, რომ ქვეყანაში ბიზნესი მონოპოლიური სქემებით იმართება, რაც ბაზარზე ფასების შესამცირებლად მთავარი დაბრკოლებაა.

ეკონომისტების უმრავლესობა ფიქრობს, რომ თითქმის ყველა სეგმენტში, სადაც ბაზრები ნაკლებად დივერსიფიცირებულია და იმპორტიორი კომპანიების რაოდენობა მცირეა, ვითარება რთულადაა, შესაბამისად სრული საფუძველია, რომ ოლიგოპოლიურ რისკებზე თამამად დაიწყოს საუბარი და მთავრობამ ამ მძიმე მდგომარეობის გამოსწორებაზე იზრუნოს, რადგან საბოლოოდ მომხმარებელი ზარალდება.

ეკონომისტი აკაკი ცომაია ამბობს, რომ მონოპოლიური ნიშნები ბევრი მიმართულებით იკვეთება და ფასების შემცირება გართულებულია განსაკუთრებით იმ ბაზარზე, სადაც ნაკლებია კონკურენცია.

,,მოთხოვნის შემცირებასთან ერთად, ფასების ზრდის ტემპიც თანდათან მცირდება, რასაც ის მდგომარეობაც უწყობს ხელს, რომ ლარი საკმაოდ გამყარებულია. თუ არსებული ტემპი გარკვეული პერიოდის განმავლობაში შენარჩუნდება, ინფლაციის დონის კლება კიდევ გაგრძელდება.

რაც შეეხება ბაზარზე არსებულ კარტელურ გარიგებებს გარკვეულ სექტორებში, უნდა ითქვას, რომ ზოგან გაიაფების ტენდენცია არ შეინიშნება და ამას დრო სჭირდება, მაგრამ ზოგან, სადაც უფრო მონოპოლიზებულია სექტორი, იქ მონოპოლისტები ფასებს მაქსიმალურად ინაჩუნებენ“, - აღნიშნა აკაკი ცომაიამ.

ეკონომისტი ამბობს, რომ ოლიგოპოლიებთან დაკავშირები საფუძვლიანი ეჭვებია და ეს ფაქტები კონკურენციის სააგენტომ საფუძვლიანად უნდა შეისწავლოს. აკაკი ცომაიას თქმით, ლარის კურსი ცხადია ხელს უწყობს იმას, რომ ფასების დონე არ გაიქცეს ზემოთ, მით უმეტეს, რომ მოსალოდნელია საგარეო მოთხოვნის ზრდის შემცირდება.

„თუმცა რთული საპროგნოზოა, თუ როგორი იქნება ლარის კურსი მომავალში. როდესაც საქმე ეხება ინფლაციას აქ მაინც უნდა გამოვიდეთ მოთხოვნა-მიწოდების ფაქტორებიდან გამომდინარე. შესაბამისად თუ მოთხოვნის ზრდის შენელება ცხადია, რომ ეს რაღაც პერიოდში ფასების დონეზეც აისახება“, — განმარტა აკაკი ცომაიამ.

მთავრობის ინფორმაციით, ფასების რეგულირების საკითხი ევროკავშირის მიერ 2019 წელს მიღებულ დირექტივაზე დაფუძნებული კანონით უნდა მოგვარდეს. თავად ეს დირექტივა კი „ფასნამატს“ ან „მარჟებს“ არ უკავშირდება და ის სასურსათო ნედლეულის პირველად მწარმოებლებს, დისტრიბუტორებსა და სავაჭრო ქსელებს შორის ურთიერთობებს აწესრიგებს.