დღეს პარლამენტის საფინანსო-საბიუჯეტო კომიტეტი საქართველოს მოქალაქე ზურაბ ვანიშვილის მიერ წარმოდგენილი საკანონმდებლო წინადადებაზე იმსჯელებს, რომელიც „არაკვალიფიციურ დღგ-ს გადამხდელთა“ უკანონო ინსტიტუტის აკრძალვას შეეხება. სწორედ აღნიშნული კომიტეტის გადაწყვეტილებაზე იქნება დამოკიდებული მოქალაქის თხოვნა/მიმართვას მიეცემა თუ არა შემდგომი მსვლელობა და მომზადდება თუ არა შესაბამისი კანონპროექტი.

როგორც მოქალაქე ზურაბ ვანიშვილის მიერ პარლამენტისთვის გაგზავნილ მიმართვაში წერია, საკანონმდებლო ორგანომ „საგადასახადო კოდექსში“ შესატანი ცვლილებები უნდა დააინიციროს და აიკრძალოს პირისთვის საგადასახადო ანგარიშ-ფაქტურის გამოწერის/გაცემის შეჩერება.

„აღნიშნული საკანონმდებლო წინადადების მიღების აუცილებლობა გამოწვეულია იმით, რომ საქართველოს საგადასახადო კოდექსში ამდაგვარი აკრძალვის არარსებობის პირობებში, შემოსავლების სამსახურმა 2021 წელს მიიღო იმდაგვარი კანონქვემდებარე ნორმატიული აქტები, რომლებმაც გადასახადის გადამხდელების მიმართ დააწესეს უჩვეულო და მსოფლიოს ისტორიაში უპრეცედენტო ინოვაცია იმის თაობაზე, რომ დღგ-ის გადამხდელად ახლად დარეგისტრირებული პირი დღგ-ის გადამხდელად რეგისტრაციის მომენტიდან ითვლება არაკვალიფიციურ დღგ-ის გადამხდელად.

ამგვარი კანონსაწინააღმდეგო ნორმების საპირწონედ მიზანშეწონილად მიგვაჩნია აღნიშნული თვითნებობის აღკვეთა უშუალოდ საგადასახადო კოდექსში ცვლილების შეტანით. წინააღმდეგ შემთხვევაში აღმასრულებელი ხელისუფლების წიაღში გაგრძელდება გადასახადის გადამხდელთა უფლებების მასიური შელახვა, თან - საქართველოს ფინანსთა მინისტრის 2011 წლის 23 მაისის №303 ბრძანებით დამტკიცებული დებულების მე-3 მუხლის მე-2 პუნქტის „ზ“ და „უ“ ქვეპუნქტების და „გადასახადების ადმინისტრირების შესახებ“ საქართველოს ფინანსთა მინისტრის 2010 წლის 31 დეკემბრის №996 ბრძანებით დამტკიცებული ინსტრუქციის 56 3 პრიმა მუხლის პირველი პუნქტის „გ“ ქვეპუნქტზე და მე-3 პუნქტის „ბ“ ქვეპუნქტზე - ფორმალურად მითითებით. სხვაგვარად რომ ვთქვათ, |არაკვალიფიციური დღგ-ის გადამხდელი-ს ინსტიტუტი ყოვლად უკანონოა, არ არის გათვალისწინებული საგადასახადო კოდექსით და ამგვარი თვითშემოქმედების აღკვეთა შესაძლებელია მარტივად, საკანონმდებლო დონეზე ამგვარი შეზღუდვის არსებობის აკრძალვის დადგენის მეშვეობით. საკანონმდებლო წინადადება მიზნად ისახავს იმ საგადასახადო ხაფანგის გაუქმებას, რომელიც თვითნებურად არის შექმნილი სსიპ შემოსავლების სამსახურის მიერ, გადასახადის გადამხდელთა ქონებრივი უფლებების შელახვის და მათთვის ფინანსური ზიანის მიყენების ერთადერთი მიზნით“, - აღნიშნულია მოქალაქე ზურაბ ვანიშვილის მიმართვაში.