საქართველო ძალიან დაინტერესებულია ჩინური ტვირთების ტრანზიტით, მაგრამ აქ დამოკიდებულებაა აშშ-სა და ჩინეთს შორის, - მიიჩნევს აკადემიკოსი ლადო პაპავა. როგორც პაპავა აცხადებს, საქართველოს კარგი ურთიერთობა აქვს ჩინეთთან, ასევე ამერიკა საქართველოს უმნიშვნელოვანესი პარტნიორია.

„აშშ-სა და ჩინეთს შორის არის სავაჭრო ომი და პრობლემა ის არის, რომ რამდენად იქნება აშშ პოზიტიურად განწყობილი იმაზე, რომ ჩინური ტვირთები წამოვიდეს ამ მიმართულებით. თუ აშშ-ს სურს, რომ საერთოდ შეზღუდოს ჩინეთთან ურთიერთობა და ჩინეთს შეექმნას ეკონომიკური პრობლემები, აშშ ამას არ მიესალმება.

ჩვენთვის აშშ ჩვენი სახელმწიფოებრივი დამოუკიდებლობის რეალური სტრატეგიული გარანტორია. აქედან გამომდინარე საქართველო ძალიან რთულ მდგომარეობაშია. ჩვენ ჩინეთთან ძალიან კარგი ურთიერთობა გვაქვს. ვაფასებთ ჩინეთის ხელმძღვანელობის დამოკიდებულებას საქართველოს ტერიტორიულ მთლიანობასთან მიმართებაში, აფხაზეთთან და სამაჩაბლოსთან მიმართებაში, ეს პრინციპულია. მნიშვნელოვანია, რომ ჩინეთი არის დღეს ძალიან სერიოზული პოტენციალის მქონე ტვირთების გამგზავნი“, - აცხადებს პაპავა.

არსებულ ვითარებაში აკადემიკოსი მიწოდების ალტერნატიული გლობალური ჯაჭვების შექმნის აუცილებლობაზე საუბრობს და აცხადებს, რომ აბრეშუმის გზის განახლებული ვარიანტის გაძლიერების საკითხი უფრო აქტუალური გახდა.

„მნიშვნელოვანი იყო საქართველოს პრემიერ-მინისტრის ზაფხულში ვიზიტები თურქმენეთში, უზბეკეთსა და ყაზახეთში. მნიშვნელოვანი იყოს ურსულა ფონ ლაინის ვიზიტი ბაქოში, ხოლო შემდეგ აზერბაიჯანის პრეზიდენტის ვიზიტი საქართველოში. ამ ყველაფერში მკაფიოდ იკვეთება, რომ რუსეთის ალტერნატიული დერეფნის ამოქმედება, რომელიც აზერბაიჯან-საქართველოზე გაივლის, ხდება სულ უფრო და უფრო აქტუალური. ყაზახეთმა შემთხვევით არ განაცხადა, რომ 3 მლნ ტონამდე გაზრდის ნავთობის ტრანზიტს საქართველოზე. ეს ძალიან დიდი პერსპექტივას იძენს“, — ამბობს პაპავა.

მისივე თქმით, პრაქტიკულად შეიქმნება აზერბაიჯან-საქართველოზე გამავალი ახალი მიწოდების ჯაჭვი, რომელიც იქნება ალტერნატიული იმ ჯაჭვის, რომელიც გადიოდა აქამდე რუსეთზე - ეს რეალურია.

„ეს ჯაჭვი შეიძლება შემდგომ გაგრძელდეს და გამოყენებული იქნეს ჩინეთისთვის. თუმცა ამის გადაწყვეტაში საქართველო მარტო ვერ იქნება“, - ამბობს პაპავა.

მისივე შეფასებით, ის გადაწყვეტილებები რაც საქართველოს მთავრობამ ეკონომიკური კუთხით მიიღო, „შეიძლება ითქვას, რომ აბსოლუტურად სწორია“.

„საქართველო არ არის ომში ჩართული. საქართველოს აქვს ეკონომიკური ზრდა. თუნდაც ეს ერთჯერადი იყოს, როგორც ზოგიერთი უცხოელი ექსპერტი იძახის, ესეც რომ არ იყოს მაღალი ინფლაციის პირობებში ჩვენი მოსახლეობის მდგომარეობა კიდევ უფრო უარესი იქნებოდა“, — განმარტავს პაპავა.