2022 წელს საქართველოდან ყურძნის ნატურალური ღვინის ექსპორტი შემცირდა. 5 თვეში ქვეყნიდან 79.8 მლნ დოლარის ღირებულების ღვინო გავიდა, რაც წინა წლის ამავე პერიოდთან შედარებით 3.7%-ით ნაკლებია.
ღვინის ეროვნული სააგენტოს ხელმძღვანელი ლევან მეხუზლა „კომერსანტთან“ ამბობს, რომ მოსალოდნელი 8-10%-იანი ზრდის ნაცვლად შესაძლოა ღვინის ექსპორტი გასული წლის მაჩვენებელს გაუტოლდეს ან მცირედით ჩამორჩეს კიდეც.
„წელს დაგეგმლი გვქონდა შარშანდელთან შედარებით ექსპორტის 8-10%-ით მატება, მაგრამ ამ ეტაპისთვის ისე ჩანს, რომ ეს გეგმა რთული მისაღწევი იქნება და უკვე არსებული მონაცემებით 2021 წელს ჩამოვრჩებით. პირველი ექვსი თვის მაჩვენებლებით, შარშანდელ მონაცემს თითქმის გავუტოლდით, საუბარია პლუს-მინუსს 1%-იან განსხვავებაზე. იმედი გვაქვს, რომ ამ რიცხვებს მაინც შევინარჩუნებთ და შარშანდელ შედეგებს გავიმეორებთ, მცირედი სხვაობებით.
ერთ-ერთი მიზეზი რატომაც ექსპორტის მიმართულებით ასეთი შედეგი გვქონდა არის ომი. რომ ავიღოთ ცალკე მდგომი უკრაინა, ძალიან დიდი კლებაა, ახლა, შედარებით დაიწყო ისევ შესყიდვები, მაგრამ 60%-ზე მეტია კლება. თუმცა, ბაზრების დივერსიფიცირებამ მოგვცა ის შედეგი რაც დღეს გვაქვს, მაგალითად 16%-იანი მატებაა ამერიკის მიმართულებით და სხვა სტრატეგიულ ბაზრებზეც ზრდა დაფიქსირდა, რის ხარჯზეც მოხდა უკრაინაში კლების გადაფარვა.
ექსპორტი დახლოებით 60 ქვეყნაში გვაქვს და მათ შორის არის ქვეყნები, რომელიც ღვინისთვის ძალიან კარგი ბაზარია და ყველა ამ ქვეყნაში სტრატეგიულად ვმუშაობთ. ჩვენთვის საინტერესოა ასევე ქვეყნები, რომელიც რაოდენობის მხრივ თითქოს ნაკლებ საინტერესოა, თუმცა ისინი არიან მაღალ მსყიდველუნარიანი და დივერსიფიცირების კუთხით აუცილებელია მათი ათვისება, მათ შორის ჩრდილო ევროპა, სკანდინავია და ბენელუქსის ქვეყნები. შექმნილ ვითარებაში მსგავსი ბაზრები საინტერესოა“, — ამბობს მეხუზლა.
2022 წელს ექსპორტი ევროკავშირის ბაზარზე გაიზარდა და ჯამში 13 მლნ დოლარამდე ღირებულების 4 198 ტონა ღვინო გავიდა, რაც 20.5%-იანი ზრდაა. დსთ-ის ქვეყნების მიმართულებით კი ღვინის ექსპორტი 10.9%-ით შემცირდა და ექსპორტის ღირებულებამ 55.1 მლნ დოლარი, მოცულობამ კი 20 096 ტონა შეადგინა.
ნინო თამაზაშვილი