როგორც წესი, საახალწლო დღესასწაულებამდე ორი კვირით ადრე, აფხაზეთში ციტრუსის ექსპორტი პიკს აღწევს, მაგრამ წელს ასე არ არის.
11 დეკემბრისთვის აფხაზეთიდან რუსეთში 10 ათას ტონაზე მეტი მანდარინი გავიდა ექსპორტზე, თითქმის 7-ჯერ ნაკლები, ვიდრე შარშანწინ. შარშან ცუდი მოსავალი იყო, მაგრამ დაახლოებით 30 ათასი ტონა მაინც გავიდა. წელს კარგი მოსავალია, ამბობენ, რომ 52 ათასი ტონა მაინც დაიკრიფება.
აფხაზეთში ციტრუსებიდან ძირითადად მანდარინი მოჰყავთ. ის აფხაზეთის სავიზიტო ბარათია, ჯერ კიდევ საბჭოთა დროიდან მოყოლებული. შარშანწინ მხოლოდ რუსეთში 68 ათასი ათასი ტონა მანდარინი გავიდა ექსპორტზე, შარშან 30 ათასი ტონა.
წლებია, რუსეთი აფხაზური მანდარინის გასაღების მთავარი ბაზარი იყო, პანდემიისას განსაკუთრებით, როცა ფედერაციის საზღვრები დიდწილად ჩაიკეტა. მხოლოდ 2020 წელს სოფლის მეურნეობის პროდუქტების ექსპორტი რუსეთში ათჯერ გაიზარდა.
წელს კი საახალწლო სუფრაზე რუსეთში ძირითადად ჩინური და თურქული მანდარინი ექნებათ.
აფხაზური მანდარინის მიმართ რუსეთის ინტერესის დაკარგვას ეკონომიკურთან ერთად პოლიტიკური მიზეზებიც შეიძლება ჰქონდეს. მოსკოვი ელოდება აფხაზეთის დე ფაქტო პარლამენტს გადაწყვეტილებას - ბიჭვინთის აგარაკებისა და ტერიტორიის რუსეთისთვის გადაცემის საკითხი ფორმალურად გადაჭრილი ისევ არ არის.
მანდარინი
