საქართველოში კორონავირუსით ინფიცირების შემთხვევების ახალი პიკია. დღიდან-დღემდე დადებითობის დღიური მაჩვენებელი იზრდება და უკვე 22%-ს გადააჭარბა. თუმცა მიუხედავად ამისა, ჯანდაცვის სამინისტრო გეგმური ამბულატორიული მომსახურების დროებით შეჩერებას, რათა ოჯახის ექიმებზე კოვიდპაციენტების რაოდენობის ზრდით გამოწვეული დატვირთვა შეამსუბუქოს, ჯერჯერობით არ გეგმავს. ამ საკითთან დაკავშირებით, რამდენიმე სადაზღვევო კომპანიის წარმომადგენელი ჯანდაცვის მინისტრის მოადგილეს თამარ გაბუნიას უკვე შეხვდა. მათი რეკომენდაციაა, შეიცვალოს მსუბუქი პაციენტების მართვის გაიდლაინი, რაც ოჯახის ექიმებს ვალდებულებებს შეუმსუბუქებს და განხილულ იქნას გეგმური ამბულატორიული მომსახურების დროებით შეჩერება, სანამ პიკური პერიოდი არ გადაივლის.
„საყოველთაო ჯანდაცვის ფარგლებში იყო იმის პრეცედენტი, რომ გვქონდა გეგმური ჰოსპიტალური მომსახურების გადავადების რამდენიმე ეპიზოდი – გადაუდებელი ქირურგიული და ჰოსპიტალური მომსახურება ვერცერთ შემთხვევაში ვერ გადავადდება. ამბულატორიული მომსახურების გადავადების ეპიზოდები არ გვქონია, რადგან ამბულატორიული მომსახურება მეტად მართვადია ექიმის და პაციენტის კომუნიკაციის რეჟიმში. ამდენად, თავად სადაზღვევო სქემებს შეუძლიათ ამაზე კომუნიკაცია. რა თქმა უნდა, დღეს მთავარია რესურსი მოხმარდეს ძირითადად ომიკრონის მართვას, რადგან 2 კვირა იქნება თუ 3 კვირა პიკური პერიოდი, გავიაროთ იმგვარად, რომ პაციენტებს არ მოაკლდეს ყურადღება. გეგმიური ამბულატორია, თუკი იძლევა ამის შესაძლებლობას, შესაძლებელია განისაზღვროს ინდივიდუალურად სადაზღვევო სქემის ფარგლებში,“- განაცხადა თამარ გაბუნიამ.
სადაზღვევო კომპანია „გლობალ ბენეფიტს ჯორჯიას“ სამეთვალყურეო საბჭოს თავმჯდომარე ნინო კობახიძე „კომერსანტთან“ ამბობს, რომ კორონავირუსის ახალი შტამის გავრცელების ფონზე დაზღვეულთა მომართვიანობა მნიშვნელოვნად არის გაზრდილი, რაც კლინიკების დატვირთვას ზრდის.
„სადაზღვევო კომპანიების რეკომენდაცია იყო, რომ მომხდარიყო გეგმიური ამბულატორიული მომსახურების დროებით შეჩერება, გამომდინარე იქედან რომ ძალიან დიდი გადატვირთვაა. ლოგიკურად სადაზღვევოებს იმიტომ სურთ ეს, რომ იმდენად არიან ოჯახის ექიმები გადართულები კოვიდ პაციენტების მართვაზე, არაკოვიდპაციენტების მობილობას სხვადასხვა კლინიკაში ფიზიკურად ვეღარ აუდიან. არ ვიცი რამდენად გამოსვლადია ეს, რადგან რთულია ჯანმრთელ ადამიანს შეუზღუდო სხვადასხვა ტიპის სამედიცინო მომსახურების ჩატარება და ჯანდაცვის სამინისტრო ამ ინიციატივით ალბათ არ გამოვა, მაგრამ სადაზღვევოებისაც მესმის, ისინი ცდილობენ მინიმუმამდე შეიმცირონ დატვირთვიანობა. დღეში 20 000 კაცი როდესაც ემატება, მთელი რესურსი ამაზე გადადის და ძალიან რთული ვითარებაა. ეს პიკი სავარაუდოდ 2-3 კვირა გაგრძელდება და მოსახლეობას უნდა ვთხოვოთ, რომ თავად შეიზღუდონ გეგმური ამბულატორიული მომსახურების ჩატარება, თუ ეს საგანგაშო არ არის.
ეს არის რეკომენდაცია, არ ნიშნავს რომ ვინმე რამეს ითხოვს. ჩემი აზრით, სახელმწიფოს მხრიდან რთული იქნება ვინმეს შეუზღუდოს გეგმიური ამბოლატორიული მომსახურების მიღება. ჩვენს დაზღვეულებს უნდა ვთხოვოთ რომ თავი შეიკავონ მსგავსი მომსახურების მიღებისგან, რადგან კოვიდის გადადების რისკიც ამა თუ იმ კლინიკაში მაღალია. ასე ერთიანი შეზღუდვა რთული იქნება, თუმცა ვერც ინდივიდუალურად ვერ მოახდენენ სადაზღვევოები ამას, რადგან დაზღვეულს ვერ ეტყვის რომ რაიმე სერვისს არ გაუწევს, თუ ის საყოველთაოდ აკრძალული არ არის“, - ამბობს ნინო კობახიძე.
სადაზღვევო ასოაციაციაში განმარტავენ, რომ თუ ინფიცირების მაჩვენებლის ზრდა გაგრძელდა, შესაძლოა რეგულაციის მიღება სამინისტროს მხრიდან საჭირო გახდეს და ამბულატორიულ სერვისები ქვეყანაში დროებით შეჩერდეს.
აღსანიშნავია, რომ 26 იანვარს გამოვლინდა კორონავირუსით ინფიცირების 17 530 ახალი დადასტურებული შემთხვევა. ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა 1 092 684 შეადგენს. რაც შეეხება დადებითობის მაჩვენებელს, 26 იანვრის მდგომარეობით, დადებითობის დღიური მაჩვენებელი არის 22.42%, ბოლო 14 დღის მანძილზე - 15.32% ხოლო 7 დღის მანძილზე - 19.58%.
ნინო თამაზაშვილი