მიგრანტების რაოდენობა მოსკოვის სამშენებლო სექტორში უნდა შემცირდეს, ხოლო დასაქმებულების ხელფასები დღევანდელთან შედარებით უფრო მაღალი უნდა იყოს - განაცხადა მოსკოვის მერმა სერგეი სობიანინმა.
თუმცა, მოგვიანებით რუსეთის დედაქალაქის მშენებლობის დეპარტამენტის უფროსმა რაფიკ ზაგრუტდინმა დააზუსტა, რომ მიგრანტებზე მასობრივი უარის თქმა არ იგეგმება.
„უფრო მაღალი კვალიფიკაციის რუსეთის მოქალაქეების დასაქმებაზე გადასვლა ეტაპობრივი და თანდათანობითი იქნება“, - განაცხადა მან.
დეველოპერების აზრით, მიგრანტების რაოდენობის შემცირდება სამშენებლო ინდუსტრიაში მენაშენეთა დანახარჯებს გაზრდის.
ბოლო 3 თვის მანძილზე მუშახელზე მოთხოვნა მოსკოვის სამშენებლო ინდუსტრიაში 20 000-ს შეადგენს, რაც 2020 წელთან შედარებით 50%-ით მეტია. ამავე დროს, დასაქმების მსურველთა რაოდენობა მხოლოდ 3-4%-ით გაიზარდა.
შეთავაზებული ხელფასები საკმაოდ მაღალია - თვეში 1100 დოლარამდე, თუმცა, მსურველთა მოლოდინი 100-150 დოლარით მეტია. სავარაუდოდ, მერის ინიციატივის ბოლომდე შესრულების შემთხვევაში დანახარჯები ხელფასებზე 20%-ით გაიზრდება, რაც მოსკოვში ისედაც უკიდურესად ძვირ უძრავ ქონებას კიდევ უფრო გააძვირებს.
მოსკოვში მშენებლობებზე ძირითადად მუშაობენ უზბეკეთის, ტაჯიკეთის, მოლდოვას, უკრაინის და ყირგიზეთის მოქალაქეები. სამსახურში მიგრანტის აყვანა ადვილი საქმე არაა - დამსაქმებელმა მას ჩამოსასვლელი ბილეთი უნდა უყიდოს, სპეციალური პატენტები გაუფორმოს, კვებით უზრუნველყოს და ა.შ.
პატენტის მიღებამდე მიგრანტის მუშაობა აკრძალულია და ხშირად ამ პროცესს თვეზე მეტი სჭირდება - მთელი ეს დრო დამსაქმებელი უსაქმოდ მყოფი მუშის ყველა ხარჯებს ანაზღაურებს, რაც საკმაოდ ძვირი სიამოვნებაა.
ამის მიუხედავად, მიგრანტების აყვანა სამსახურში უფრო მომგებიანია, ვიდრე რუსეთის მოქალაქეების, რომლებიც დეველოპერებს 20-30%-ით მეტი უჯდებათ.
„სამშენებლო სექტორში მუშახელის მწვავე დეფიციტია და ეს რუსეთის ყველა რეგიონს, როგორც კომერციულ, ასევე სახელმწიფო მშენებლობებს ეხება. დღეს ამ დეფიციტის ადგილობრივი კადრებით შევსების არანაირი საშუალება არ არსებობს“, - განაცხადა დეველოპერული კომპანიის „ოსნოვა“ დირექტორმა ალექსანდრ რუჩიოვმა.
მისი თქმით, ყველა ბოლო მოვლენა - რეფინანსირების განაკვეთის ზრდით დაწყებული, პანდემიასთან დაკავშირებით შრომითი მიგრაციის შეზღუდვით დასრულებული, მშენებლობის პროცესს მნიშვნელოვნად აძვირებს.
სახელმწიფო პროექტებშიც იგივე მდგომარეობაა.
„მიგრანტებს ვერ შეცვლით, ეს ფაქტია. ჩვენ ჯერ არ გვყავს სხვადასხვა კვალიფიკაციის ამდენი საკუთარი მუშახელი. ამიტომაც მიგრანტებზე უარის თქმა შეუძლებელია, რადგანაც მათ გარეშე მშენებლობის ღირებულება მკვეთრად გაიზრდება“, - მიიჩნევს სახელმწიფო კომპანია „გრანელის“ დირექტორი ანდრეი ზიმონოვი.
მისი თქმით, კადრების ჩანაცვლებას მინიმუმ 2-3 წელი დასჭირდება, და ეს უკეთეს შემთხვევაში.
„ხელფასების მომატება კარგია, მაგრამ ეს ერთადერთი პრობლემა არაა. ხელფასისგან განურჩევლად ბევრ მოსკოველს მძიმე სამუშაოს შესრულება, მუშაობა ღია სივრცეში, ნებისმიერ ამინდში, ღამის ცვლაში არ სურს“, - მიიჩნევს ზიმონოვი.
Forbes