რუსეთის საგარეო საქმეთა სამინისტროში არ გამორიცხავენ რუსი სამხედრო ტყვეების გაცვლას უკრაინის ქალაქ მარიუპოლის მეტალურგიული ქარხნის, „აზოვსტალის“ რაიონიდან რუსეთის მიერ კონტროლირებულ ტერიტორიაზე გადაყვანილ უკრაინელ სამხედროებში. ამის შესახებ კრემლის მიერ კონტროლირებული სააგენტოები, „ინტერფაქსი“ და „ტასი“ იუწყებიან.

„მე ვუშვებ ნებისმიერ შესაძლებლობას, რომელიც საღ აზრს არ ეწინააღმდეგება“, - უთხრა დღეს, 23 მაისს, მოსკოვში ჟურნალისტებს რუსეთის საგარეო საქმეთა მინისტრის მოადგილემ, ანდრეი რუდენკომ. შეკითხვას, განიხილება თუ არა გაცვლის საკითხი, რუდენკომ უპასუხა, რომ „ალბათ, განიხილება“.

რუსეთის მიერ კონტროლირებული ე.წ. დონეცკის სახალხო რესპუბლიკის მეთაურმა, დენის პუშილინმა სააგენტო „ინტერფაქსს“ დღეს განუცხადა, რომ „აზოვსტალში ტყვედ აყვანილები“ იმყოფებიან „დონეცკის სახალხო რესპუბლიკის ტერიტორიაზე“, სადაც „საერთაშორისო ტრიბუნალის ორგანიზება იგეგმება“.

რუსეთის დუმის საერთაშორისო საქმეთა კომიტეტის თავმჯდომარემ, ლეონიდ სლუცკიმ 21 მაისს, დონეცკში გამართულ პრესკონფერენციაზე განაცხადა, რომ შესაბამისი უფლებამოსილების მქონე პირები შეისწავლიან ვიქტორ მედვედჩუკში „აზოველების“ გაცვლის შესაძლებლობას. ასეთ შესაძლებლობას ვერ ხედავს რუსეთის პრეზიდენტ პუტინის პრესმდივანი დმიტრი პესკოვი. „მედვედჩუკი უკრაინის მოქალაქეა, რუსეთთან კავშირი არ აქვს და არ არის სამხედრო. ხოლო იმ პირების შემთხვევაში, რომლებიც აზოვსტალში ტყვედ ჩაბარდნენ, საუბარია სამხედროებზე და ნაციონალისტური ფორმირებების წევრებზე. ამიტომ, სრულიად სხვადასხვა კატეგორიის პირები არიან“, - უთხრა დღეს, 23 მაისს ჟურნალისტებს პესკოვმა.

უკრაინის პარლამენტის ყოფილი დეპუტატი, პრორუსული პარტიის „ოპოზიციური პლატფორმა-სიცოცხლისთვის“ ლიდერი და პრეზიდენტ პუტინის ნათლიმამა ვიქტორ მედვედჩუკი უკრაინის უშიშროების სამსახურმა 2022 წლის აპრილში დააკავა. უკრაინის გენერალური პროკურატურა მედვედჩუკს ბრალს სდებს სახელმწიფოს ღალატსა და ტერორისტული საქმიანობის მხარდაჭერაში.

radiotavisupleba.ge