2021 წლის II კვარტლისთვის ბიზნესის განწყობის ინდექსი (BCI) 1.7 პუნქტით შემცირდა და 1.7-ს გაუტოლდა, წინა კვარტალში საგრძნობი გაუმჯობესების შემდეგ. ბიზნესის განწყობის ყველაზე დიდი გაუარესება ვაჭრობის სექტორში დაფიქსირდა, რომელსაც მოყვება სოფლის მეურნეობის და მშენებლობის სექტორები.
ბიზნესის მოლოდინების ინდექსი, რომელიც გვიჩვენებს, რამდენად ოპტიმისტურად არის განწყობილი ბიზნეს სექტორი მომავლის მიმართ, 2021 წლის I კვარტლის გაუმჯობესების შემდეგ გაუარესდა და 9.0 პუნქტი შეადგინა. 2021 წლის II კვარტლისთვის მოლოდინების შემცირება დაფიქსირდა ვაჭრობის, მშენებლობისა და მომსახურების სექტორებში. გასაყიდი ფასების მოლოდინების ინდექსი შემცირდა 12.4-ით და 17.2 პუნქტს მიაღწია. ეს მნიშვნელობა გვიჩვენებს, რომ ბიზნესების უფრო ნაკლები წილი ვარაუდობს ფასების გაზრდას საკუთარ პროდუქტზე. მხოლოდ სამშენებლო და მომსახურების სექტორებში ელოდება ბიზნესების უფრო მეტი წილი ფასების გაზრდას.
რაც შეეხება ბიზნესის შემზღუდავ მთავარ ფაქტორებს, წინა წლებისგან განსხვავებით, მნიშვნელოვნად გაიზარდა მოთხოვნის სიმცირე, როგორც დამაბრკოლებელი ფაქტორი.
კერძოდ, დიდი კომპანიების უმეტესობისთვის მთავარი პრობლემა სწორედ მოთხოვნაა. გამოკითხული მსხვილი კომპანიების 41% ამბობს რომ მოთხოვნა მათთვის ნომერ პირველი პრობლემაა. მაჩვენებელი კიდევ უფრო მაღალია მცირე და საშუალო კომპანიების შემთხვევაში - 48%.
მცირე და საშუალო კომპანიებისთვის, საქმიანობის შემზღუდავ მთავარ ფაქტორად ფინანსებზე ხელმისაწვდომობა სახელდება - 51%. რაც შეეხება მსხვილ კომპანიებს - მათი 29% ამბობს რომ ფინანსებზე ხელმისაწვდომობა მათ საქმიანობას ზღუდავს.
GBC.GE