როდესაც მიიღება ისეთი გადაწყვეტილებები, რომელიც არაა მოსალოდნელი და ფორსირება ხდება, რა თქმა უნდა, ეს უკვე ბიზნესს რაღაც კითხვის ნიშანს უჩენს - ამის შესახებ „ექსპო ჯორჯიას“ დირექტორმა რესან ქიქავამ საქმის კურსთან საუბარში განაცხადა. მისი თქმით, ხელისუფლების მხრიდან მსგავსი ქმედებები არასტაბილურობის განცდას აჩენს.
„როდესაც მიიღება ისეთი გადაწყვეტილებები, რომელიც არაა მოსალოდნელი და ფორსირება ხდება, რა თქმა უნდა, ეს უკვე ბიზნესს რაღაც კითხვის ნიშანს უჩენს, რომ იქნებ მომავალშიც ასეთი რამე მოხდეს. ბიზნესისთვის, როცა შენ არ ხარ რომელიღაც კავშირის წევრი და ხარ ცალკე სახელმწიფო, ვის უჯერებ, ვინ არის შენი მეგობარი, ამას აქვს ძალიან დიდი მნიშვნელობა. როდესაც შენ არ უჯერებ მეგობრებს და მიდიხარ დინების საწინააღმდეგოდ ეს არასტაბილურობის შემქმნელი განცდაა.
ბიზნესჭრილში, ჩვენთვის ძალიან მნიშვნელოვანია, რომ არ ხდებოდეს ასეთი დაჩქარებული, მოუმზადებელი გადაწყვეტილებების მიღება და მერე ამ გადაწყვეტილების უკან წაღებაც. ეს ყველაფერი იმის მანიშნებელია, რომ ან მანამდე არ ხდება შესწავლა, რისკების განსაზღვრა, ან მერე რა ხდება გაუგებარია. ყოველ შემთხვევაში, ეს აჩენს განცდას, რამდენად მდგრადია ზოგადად ეს ქვეყანა საინვესტიციოდ,“- განაცხადა რესან ქიქავამ.
გასული დღეების განმავლობაში საქართველო მასშტაბურმა საპროტესტო აქციებმა მოიცვა, საპარლამენტო უმრავლესობის მიერ პირველი მოსმენით მიღებული ე.წ აგენტების კანონპროექტის გამო, რომელზეც საზოგადოების დიდი ნაწილი და საერთაშორისო პარტნიორები მიიჩნევენ, რომ ის არასამთავრობო ორგანიზაციების და თავისუფალი მედიის შეზღუდვის დიდ რისკს შეიცავდა და თავისი არსით ძალიან ჰგავდა რუსეთში მოქმედ კანონს ე.წ აგენტების შესახებ. საბოლოოდ პროტესტმა შედეგი გამოიღო და მმართველი პარტია იძულებული გახდა კანონპროექტი მეორე მოსმენაზე ჩააგდო. აღნიშნული კანონპროექტის მიმართ კრიტიკული შეფასებები იყო თითქმის ყველა სექტორის წარმომადგენლის მხრიდან.