საფინანსო სექტორში მსესხებლების 12.4%-ს ვადაგადაცილება უფიქსირდება.
საკრედიტო საინფორმაციო ბიურო „კრედიტინფო საქართველოს“ ოქტომბრის მონაცემებით, კომერციული ბანკების მსესხებლების დაახლოებით 9%-ს ვადაგადაცილება აქვს. კერძოდ, საბანკო სექტორში 150 ათასამდე მსესხებელს 30 დღიდან 3 წლამდე პერიოდის ფარგლებში ვადაგადაცილება უფიქსირდება.
კიდევ უფრო მაღალია პრობლემური სესხების წილი არასაბანკო საფინანსო სექტორში, სადაც ეს მაჩვენებელი 18%-ს აჭარბებს. არასაბანკო საფინანსო სექტორში 607 ათასი მსესხებლიდან 110 ათასზე მეტ მსესხებელს აქვს ვადაგადაცილება.
როგორც საფინანსო ორგანიზაციებში აცხადებენ, 2020 წელთან შედარებით ვადაგადაცილებული სესხების წილი შემცირებულია. თუმცა მათი ნაწილის თქმით, მსგავსი სესხების მოცულობა მოსალოდნელზე დაბალი ტემპით მცირდება, რისი მთავარი მიზეზი ქვეყანაში არსებული არასტაბილური ეკონომიკური მდგომარეობა და გაუარესებული ეპიდვითარებაა.
„საფინანსო ინსტიტუტებს და მათ მსესხებლებს აუცილებლად სჭირდებათ პროგნოზირებადი გარემო, ახლა კი ასეთი გარემო არ გვაქვს, ეპიდვითარება გაუარესებულია და არც ვაქცინაციის ტემპია მაღალი. შესაბამისად, ეს აისახება ვადაგადაცილებული სესხების ზრდაშიც. შარშანდელთან შედარებით მსგავსი სესხების მოცულობა შემცირებულია, თუმცა ეს მაჩვენებელი ისეთი ტემპებით არ მცირდება, როგორც ამას მაგალითად ზაფხულში ველოდით. არსებული არაპროგნოზირებადი გარემო განსაკუთრებით უარყოფითად აისახება მიკროსაფინანსო ორგანიზაციების მსესხებლებზე, რომელთა უდიდეს ნაწილს ფიზიკური პირები და მიკრომეწარმეები წარმოადგენენ“,- განუცხადა „ბიზნეს ფორმულას“ MBC-ის დამფუძნებელმა, გია პეტრიაშვილმა.
ცნობისთვის, “კრედიტინფოს” ბაზაში მხოლოდ 3 მლნ ლარამდე მოცულობის სესხების შესახებაა ინფორმაცია მოყვანილი. რაც შეეხება ეროვნული ბანკის მონაცემებს უმოქმედო სესხებთან დაკავშირებით, მარეგულირებლის ინფორმაციით, მსგავსი სესხების წილი საბანკო სექტორში ბოლო თვეების განმავლობაში 8.5%-დან 6%-მდე შემცირდა.
წყარო: businessformula.ge