“მას შემდეგ რაც ომი დაიწყო და რუსეთი უკრაინაში შეიჭრა „არქმა“ 700-800 ბინა გაყიდა და აქედან მხოლოდ 7-8 ბინაა უცხო ქვეყნის მოქალაქეზე გაყიდული“ - ამის შესახებ BMG TV-ს ეთერში სამშენებლო კომპანია „არქის“ დამფუძნებელმა ილია წულაიამ ისაუბრა. მისი თქმით, ბინების გაყიდვაზე დადებითი ეფექტი მოახდინა იმან, რომ ემიგრანტები, რომლებიც საქართველოში ჩამოდიან ბინებს ქირაობენ მათგან ვინც ეს ბინები შეიძინეს.

„გაძვირდა იჯარა და უკვე  ჩვენმა  მოქალაქეებმა, ტრადიციულმა კლიენტურამ  და მომხმარებელმა დამატებითი  უძრავი ქონების შესყიდვა გადაწყვიტეს, რადგან გაქირავება უფრო მომგებიანი გახდა და სწორედ ამან წაახალისა მოთხოვნის ზრდა. თუმცა ფასების  ზრდა არა მოთხოვნის ზრდამ, არამედ იმან წაახალისა, რომ ბევრი დეველოპერი იძულებული გახდა, რომ  ფასი გაეზარდა, რადგან სამშენებლო მასალების ფასი გაიზარდა.

ფასები დაახლოებით 28-30%-ით  არის გაზრდილი უცხოურ  ვალუტაში, რომ ვთქვათ კვადრატული მეტრის  მშენებლობა, ბოლო ერთი  წელიწადში 100 -120 დოლარით გაძვირდა“-  აღნიშნა ილია წულაიამ.

რაც  შეეხება ბიზნესის აღდგენას, ილია  წულაია  ამბობს, რომ სექტორი „არქის“ მონაცემებით აღდგა  როგორც რაოდენობის მხრივ, თუმცა  ფასების მხრივ  უფრო მეტია ვიდრე ეს იყო პანდემიამდე იყო.

„არქის“  შემთხვევაში ბინაზე  ფასები პანდემიამდელ მაჩვენებელზე 10-15%-ით მეტია და  ალბათ  დეველოპერულ ბაზარზეც იგივე  მდგომარეობაა. რაც  შეეხება მოლოდინებს, ეს დამოკიდებულია ინფლაციაზე, ლარი ბოლო პერიოდში გამყარდა, თუმცა ინფლაციას ვერ აბალანსებს. მთავარი ფაქტორი ის არის, რომ დეველოპერები  ითვლიან დოლარის  ეკვივალენტ  ლარში,  შესაბამისად ლარის  გამყარება კიდევ უფრო უძვირებს დეველოპერს პროდუქციას“, - აღნიშნა ილია წულაიამ.