„მშენებლობა განვადებით“ - ეს ერთი მთავარი საკითხია, რაზეც 17 თებერვალს,  მთავრობის ეკონომიკურ გუნდსა და სამშენებლო სფეროს წარმომადგენლების შეხვედრისას იმსჯელეს.  პრემიერ-მინისტრი ირაკლი ღარიბაშვილის ახალი ინიციატივის თანახმად, სამშენებლო ბიზნესს მთავრობა მისცემს გარანტირებულ დაკვეთას სხვადასხვა საჯარო ინფრასტრუქტურის აშენებისთვის, თანხას კი განვადებით, 5-6 წლის განმავლობაში გადაიხდის.

მთავრობის ახალი პროგრამას ,,კომერსანტთან“ დადებითად აფასებენ როგორც სამშენებლო ბიზნესის წარმომადგენლები, ასევე საფინანსო ბაზრის სპეციალისტები, თუმცა აქვთ გარკვეული შენიშვნებიც. როგორც მენაშენეთა ასოციაციის ხელმძღვანელი ირაკლი როსტომაშვილი აღნიშნავს,  ბევრი რამ არის გასათვალისწინებელი და სანახავი, ვინაიდან უცნობია, ინიციატივა როგორ შეუწყობს ხელს სამშენებლო სექტორს არსებული პრობლემის მოგვარებაში.

,,ახალი პროგრამის მიზანია, რომ მოკლე პერიოდში მოხდეს თანხების საქართველოს ეკონომიკაში ჩაშვება. ამ მხრივ აშკარად წინგადადგმული ნაბიჯია და ვფიქრობთ, რომ  ძალიან კარგ შედეგს მოიტანს. თუმცა რა გავლენას მოახდენს უშუალოდ სექტორის საქმიანობაზე, წინასწარ შეფასება გამიჭირდება. ბევრი რამ არის გასათვალისწინებელი და სანახავი, მაგალითად, არ ვიცით, რა პროდუქცია როგორ უნდა შეიძინონ. მთლიანობაში, პრემიერის ეს შეთავაზება არის გამართული, თუმცა, ახლა მნიშვნელოვანია, გაიწეროს და აისახოს ხელშეკრულებაში. ჩვენთვის ერთ-ერთი საინტერესო საკითხია ბინების სპეციფიკაცია, სად შენდება  - თბილისში თუ რეგიონებში, ფასთა ნუსხა როგორია და სხვა, რასაც თანმიმდევრულად გაეცემა პასუხი. ამასთან, გარკვეული მუშაობა წარიმართება, რომ განხორციელდეს  ბინათმშენებლობა პოლიციელებისთვის, სამხედროებისა და დევნილებისთვის, რაშიც  დეველოპერული ორგანიზაციები მიიღებენ მონაწილეობას და თავიანთ პროდუქციასაც წარადგენენ“, -  ამბობს  როსტომაშვილი.

სამშენებლო კომპანიების ნაწილი ,,კომერსანტთან“ ამბობს, რომ მთავრობის წარმომადგენლებთან შეხვედრის შესაძლებლობა არ ჰქონდათ. ეს კიდევ ცალკე პრობლემაა, რაზეც კომპანია ,,ივერონის“ ხელმძღვანელი არჩილ ჯაყელი ამახვილებს ყურადღებას და დასძენს, რომ კომუნიკაციის დიდი დეფიციტია.

,,ბოლო წლებში მთავრობისა და სექტორის წარმომადგენელთა შეხვედრებს ვერ ვესწრებით. საერთოდ, კომუნიკაციის საშუალება არ გვაქვს. არსებობს ერთი მხარე - მთავრობასთან დაახლოებული ბიზნესი, რომელსაც ოფიციალურ შეხვედრებზე იწვევენ და უსმენენ, ხოლო მეორე მხარესაა კომპანიების უმეტესობა, რომლებსაც ამის ელემენტარული შესაძლებლობა არ აქვს.  ყველა შეხვედრას ყოველთვის მსხვილი  კომპანიების წარმომადგენლები ესწრებიან.  საშუალო კომპანიებს იგნორირებას უწევენ, ისინი ფაქტობრივად მარტო უმკლავდებიან პრობლემას, რაც საბოლოოდ ბაზარზე არაჯანსაღი კონკურენციის მიზეზი ხდება“, - ამბობს ჯაყელი ,,კომერსანტთან“

მთავრობის წარმომადგენლებთან შეხვედრას ვერც ,,აი ჯი ეს ჯგუფის“ ხელმძღვანელი შოთა გუჯაბიძე დაესწრო.

,,შესაძლებლობა რომ მქონოდა, დავესწრებოდი, მაგრამ არ მოვუწვევივართ. მით უმეტეს, ისეთი საკითხი გაჟღერდა - სამშენებლო განვადება, რითაც ძალიან ვარ დაინტერესებული. დეტალებს გავეცნობი და გაირკვევა, მექნება თუ არა ამ პროგრამით სარგებლობის შესაძლებლობა. თუკი პირობები მისაღები იქნება, დიდი ალბათობით, ჩავერთვები“, - ამბობს დეველოპერი.

შეგახსენებთ, რომ სამშენებლო სექტორისთვის მნიშვნელოვანი შეთავაზება იგეგმება. მთავრობის ახალი პროგრამის მიხედვით, საუბარია ხელშეკრულებების გაფორმებაზე სამშენებლო კომპანიებთან, სადაც დამკვეთი სახელმწიფო იქნება, თანხას კი ამა თუ იმ ინფრასტრუქტურული პროექტის განხორციელებისთვის კომპანიები რამდენიმე წლის განმავლობაში მიიღებენ. ამ კრედიტების გარანტორი მთავრობა იქნება, რომელიც მშენებლობის დასრულების შემდეგ სამშენებლო კომპანიას დაფინანსებას განვადების გზით გადაუხდის. 

მარი ჩიტაია