მშენებლობის (გარდა განსაკუთრებული მნიშვნელობის რადიაციული ან ბირთვული ობიექტების მშენებლობისა ) ნებართვის მოსაკრებელი იზრდება. აღნიშნულს „ადგილობრივი მოსაკრებლების შესახებ“ კანონში შესატანი ცვლილებები ითვალისწინებს. პარლამენტის მიერ დამტკიცების შემდეგ კანონი ძალაში 2023 წლის 1-ლი იანვრიდან შევა. 

როგორც კანონპროექტის განმარტებით ბარათშია აღნიშნული, მშენებლობის (გარდა განსაკუთრებული მნიშვნელობის რადიაციული ან ბირთვული ობიექტის მშენებლობისა) ნებართვა გაიცემა მუნიციპალიტეტების მიერ. ცხადია ნებართვის გაცემა დაკავშირებულია შესაბამის ადმინისტრაციულ რესურსთან, როგორც ადამიანური ასევე მატერიალურ-ტექნიკური ბაზის თვალსაზრისით. ამასთან, რაც მეტია მოთხოვნა, რასაკვირველია მეტია რესურსის საჭიროებაც.

დღეის მდგომარეობით, მოსაკრებელი მშენებლობის (გარდა განსაკუთრებული მნიშვნელობის რადიაციული ან ბირთვული ობიექტის მშენებლობისა) ნებართვისათვის ახალასაშენებელი ობიექტის პროექტით გათვალისწინებული განაშენიანების ინტენსივობის კოეფიციენტის (კ-2) საანგარიშო ფართობის თითოეული კვადრატული მეტრისათვის არ უნდა აღემატებოდეს 4 ლარს, ხოლო საკურორტო ზონაში სამრეწველო ობიექტის მშენებლობისათვის – 5 ლარს, რაც არსებული პრაქტიკის გათვალისწინებით საგრძნობლად დაბალია.

შესაბამისად, წარმოდგენილი კანონპროექტი ითვალისწინებს მშენებლობის (გარდა განსაკუთრებული მნიშვნელობის რადიაციული ან ბირთვული ობიექტების მშენებლობისა ) ნებართვისათვის მოსაკრებლის ოდენობის გაზრდას 4 ლარიდან 10 ლარამდე, ხოლო საკურორტო ზონაში სამრეწველო ობიექტის მშენებლობისათვის – 5 ლარიდან 11 ლარამდე.

ამასთან, მოსაკრებლის ოდენობის გაზრდა არ ეხება ინდივიდუალური საცხოვრებელი სახლის მშენებლობებს, რა დროსაც მოსაკრებლის ოდენობა ისევ დარჩება არაუმეტეს 4 ლარი (ახალასაშენებელი ობიექტის პროექტით გათვალისწინებული განაშენიანების ინტენსივობის კოეფიციენტის (კ-2) საანგარიშო ფართობის თითოეული კვადრატული მეტრისათვის). ამასთანავე, იმის გათვალისწინებით რომ მოსაკრებლის გადამხდელისათვის ეს ზრდა არ იყოს დაუგეგმავი ფინანსური ხარჯის ზრდა, მოსაკრებლის ოდენობის გაზრდა გათვალისწინებულია ეტაპობრივად, კერძოდ: 2023 წლის 1 იანვრიდან 6 ლარამდე, 2024 წლის 1 იანვრიდან 8 ლარამდე და 2025 წლის 1 იანვრიდან 10 ლარამდე. რაც შეეხება საკურორტო ზონაში სამრეწველო ობიექტის მშენებლობისათვის 2023 წლის 1 იანვრიდან 7 ლარამდე, 2024 წლის 1 იანვრიდან 9 ლარამდე და 2025 წლის 1 იანვრიდან 11 ლარამდე.

„ადგილობრივი მოსაკრებლების შესახებ“ კანონპროექტის განმარტებით ბარათში აღნიშნულია, რომ პროექტის მიღების შემთხვევაში, ადმინისტრაციულ ორგანოებს (მუნიციპალიტეტებს) მეტი რესურსის მობილიზების შესაძლებლობა ბიუჯეტში (გამომდინარე იქიდან, რომ კანონით დადგენილი მოსაკრებლის მაქსიმალური ოდენობა გაიზრდება და შესაბამის მუნიციპალიტეტსაც, თავისი გადაწყვეტილების შესაბამისად, შეეძლება მის ადმინისტრაციულ საზღვრებშიც გაზარდოს ამ მოსაკრებლის ოდენობა კანონით დადგენილ მაქსიმალური ოდენობის ზღვრის ფარგლებში). დამატებითი რესურსის მობილიზება კი კიდევ უფრო ეფექტურს გახდის ნებართვის გაცემის ადმინისტრირების პროცესს.

კანონპროექტის მიღება, გავლენას იქონიებს თავად სანებართვო მოსაკრებლის გადამხდელზეც, გამომდინარე იქიდან, რომ ეტაპობრივად, წლების მიხედვით მოხდება სანებართვო მოსაკრებლის ოდენობის ზრდა. თუმცა, საბოლოო ჯამში, მოსაკრებლის გადამხდელის მიერ გადახდილი გაზრდილი ოდენობა, რომელიც სრულად მიიმართება ადგილობრივ ბიუჯეტში, ერთმნიშველოვნად შეუწყობს ხელს პროცესის ადმინისტრირების კიდევ უფრო გაუმჯობესებას.

კანონპროექტის მიხედვით ინდივიდუალური საცხოვრებელი სახლის მშენებლობისათვის მოსაკრებლის ოდენობა კვლავ რჩება იგივე ოდენობა (არ უნდა აღემატებოდეს 4 ლარს), ხოლო საკურორტო ზონაში სამრეწველო ობიექტის მშენებლობისათვის იზრდება და არ უნდა აღემატებოდეს 11 ლარს, ასევე სხვა დანარჩენი შემთხვევისათვის იზრდება დადგენილი მოსაკრებელი, რომელიც არ უნდა აღემატებოდეს 10 ლარს.

კანონპროექტის მიღება დადებით გავლენას მოახდენს მუნიციპალიტეტის ბიუჯეტის საშემოსავლო ნაწილზე. მაგალითად, ქალაქ თბილისის მუნიციპალიტეტში, ბიუჯეტში წლიური შემოსულობა სანებართვო მოსაკრებლიდან არის საშუალოდ 12,5 მილიონი ლარი. მოსაკრებლის ოდენობის გაზრდის შემთხვევაში, ცხადია ეს თანხაც გაიზრდება პროპორციულად, წლების მიხედვით (დაახლოებით იმ პროპორციით, რა პროპორციითაც ხდება მოსაკრებლის ოდენობის გაზრდა წლების მიხედვით).

ამასთანავე, გასათვალისწინებელია რომ მუნიციპალიტეტის ბიუჯეტის საშემოსავლო ნაწილზე ზემოაღნიშნულ გავლენას იმ შემთხვევაში ექნება ადგილი, თუ შესაბამისი მუნიციპალიტეტი მიიღებს გადაწყვეტილებას მის ადმინისტრაციულ საზღვრებში გაიზარდოს მოსაკრებლის უკვე დადგენილი ოდენობა კანონით განსაზღვრული ზედა ზღვრის ფარგლებში.