„მსოფლიო ბანკი“ მიიჩნევს, რომ დოლარიზაცია საქართველოს ეკონომიკის და ფინანსური სისტემის მთავარ გამოწვევად რჩება. ამის შესახებ ორგანიზაციის მიერ საქართველოს საფინანსო სექტორის შეფასების ფარგლებში გამოქვეყნებულ უახლეს ანგარიშში ნათქვამია.

ანგარიშში აღნიშნულია, რომ ბოლო წლების განმავლობაში ეროვნული ბანკის მიერ ლარიზაციის მიმართულებით გადადგმულმა ნაბიჯებმა ფინანსურ სტაბილურობაზე დადებითი გავლენა იქონია. თუმცა მსოფლიო ბანკი ასევე მიუთითებს, რომ პროგრესის მიუხედავად, დოლარიზაციის არსებული დონე საქართველოს ეკონომიკისთვის კვლავაც რისკის შემცველია.

კერძოდ, „მსოფლიო ბანკის„ შეფასებით, ფინანსური სტაბილურობისთვის კვლავ პრობლემად რჩება არაჰეჯირებული მსესხებლების საკრედიტო რისკები, მეორე მხრივ კი დეპოზიტების მიმართულებით მაღალი დოლარიზაცია ლარის სესხებზე მაღალ განაკვეთებს იწვევს.

ეროვნულ ბანკში დოლარიზაციის დონის შემცირების ტემპით კმაყოფილები არიან, თუმცა ამბობენ, რომ არსებული მაჩვენებელი კვლავაც მაღალია. მარეგულირებელში განმარტავენ, რომ საბანკო სისტემაში უცხოური ვალუტის წილის უფრო სწრაფად შემცირებას ბოლო წლების განმავლობაში მომხდარმა შოკებმაც შეუშალა ხელი.

“დედოლარიზაცია ზოგადად გრძელვადიანი პროცესია და ჩვენი ინსტრუმენტებით ამ ტრენდის მყისიერი შეცვლა შეუძლებელია. თუმცა მაინც კარგი ტენდენცია გვაქვს, მაგალითად, სესხების მიმართულებით უკვე თითქმის მივუახლოვდით 50%-იან ლარიზაციის მაჩვენებელს. ჩვენ წელს უკვე ახალი რეგულაციაც შემოვიღეთ, რომელიც უცხოური ვალუტის იპოთეკურ სესხებს ეხება. ვხედავდით, რომ მათ შორის, მონეტარული პოლიტიკის გამკაცრების ფონზე, იზრდებოდა ინტერესი უცხოური ვალუტის სესხების მიმართ და ეს დამატებით რისკებს ქმნიდა ფინანსური სტაბილურობისთვის. შესაბამისად, ველით, რომ ახალი რეგულაციის შედეგად, შემცირდება მსგავსი ტიპის იპოთეკური სესხები, ასევე მომხმარებლების ნაწილი ეროვნული ვალუტის იპოთეკურ სესხებზე გადმოერთვება“,- განუცხადა „ბიზნეს ფორმულას“ ეროვნული ბანკის ფინანსური სტაბილურობის დეპარტამენტის უფროსმა, დავით უტიაშვილმა.

ცნობისთვის. ბოლო მონაცემებით, საბანკო სექტორში ლარის სესხების წილი თითქმის 50%-მდეა გაზრდილი. თუმცა შედარებით მაღალ დონეზე ნარჩუნდება დეპოზიტების დოლარიზაცია და ანაბრების 60% კვლავ უცხოურ ვალუტაშია განთავსებული. ამასთან, ეროვნულმა ბანკმა ლარიზაციის დასაჩქარებლად ახალი რეგულაციები აამოქმედა. მათ შორის, უცხოური ვალუტის იპოთეკური სესხების მაქსიმალური ვადიანობა 15-დან 10 წლამდე შემცირდა, რითაც მარეგულირებელი მსგავსი სესხების შემცირებას ისახავს მიზნად.

წყარო: businessformula.ge