მსოფლიო ბანკი მიიჩნევს, რომ საქართველოში ფულის გათეთრების რისკებს ძირითადად ნაღდი ფულის ფართო გამოყენება ქმნის. ამის შესახებ საქართველოს საფინანსო სექტორის შეფასების ახალ ანგარიშშია ნათქვამი.  

საერთაშორისო საფინანსო ორგანიზაცია აღნიშნავს, რომ საქართველოში ფულის გათეთრების რისკების მიმართულებით ერთ-ერთი ყველაზე საფრთხის შემცველი უძრავი ქონების სექტორია, რაც თავის მხრივ, ამ ბაზარზე ნაღდი ფულით განხორციელებულ ტრანზაქციებს უკავშირდება.

მსოფლიო ბანკი რისკის შემცველ სექტორებად ასევე მიიჩნევს აზარტული თამაშების ბიზნესს და ციფრული აქტივების მიმართულებას. ფულის გათეთრებასთან დაკავშირებული რისკების შესამცირებლად მსოფლიო ბანკი საქართველოს ნაღდი ფულით ტრანზაქციებზე გარკვეული ლიმიტების დაწესებას ურჩევს. ორგანიზაციის კიდევ ერთი რეკომენდაციაა, მთავრობამ უძრავი ქონების დარგში მოქმედი აგენტებისთვის რიგი რეგულაციები შეიმუშაოს.

ეროვნულ ბანკში აცხადებენ, რომ საქართველოში ნაღდი ფულის ბრუნვა მართლაც მაღალია, თუმცა ამ ეტაპზე ნაღდი ფულით ტრანზაქციებზე რაიმე ტიპის შეზღუდვის დაწესება არ განიხილება.

„ნაღდი ფულის ბრუნვა საქართველოში სხვა ქვეყნებთან შედარებით მართლაც მაღალია და სწორედ ამიტომ ამახვილებენ ყურადღებას ამ მიმართულებით საერთაშორისო ორგანიზაციები. ეროვნული ბანკი ტრანზაქციების გაციფრულებას მიესალმება და ამ მიმართულებით ბევრი პროექტიც გვაქვს. ამ ეტაპზე რაიმე კონკრეტული გეგმა, რომ ნაღდი ფულით ტრანზაქციებზე შეზღუდვები დაწესდეს, არ გვაქვს“,- განუცხადა „ბიზნეს ფორმულას“ ეროვნული ბანკის ვიცე-პრეზიდენტმა, პაპუნა ლეჟავამ.

ცნობისთვის, ეს პირველი შემთხვევა არაა, როდესაც საერთაშორისო ორგანიზაციები საქართველოს ფულის გათეთრების რისკებზე მიუთითებენ. 2020 წლის ნოემბერში გამოქვეყნებულ ანგარიშში Moneyval-ი აღნიშნავდა, რომ სხვა მიმართულებებთან ერთად საქართველოში ფულის გათეთრების მაღალი რისკები უძრავი ქონების ბაზარზეცაა.

businessformula.ge