რუსეთის უკრაინაში შეჭრამ სურსათზე ფასები მთელს მსოფლიოში გაზარდა. ყველაზე მეტად მარცვლეული გაძვირდა. მსოფლიო ბანკის პროგნოზით რეკორდული ფასები შესაძლოა 2024 წლის ბოლომდე შენარჩუნდეს.
ომამდე რუსეთი და უკრაინა ხორბლის მთავარ ექსპორტიორ ქვეყნებად ითვლებოდნენ და მათზე გლობალური ექსპორტის 30% მოდიოდა. როგორც ერთი ასევე მეორე ქვეყანა დიდი რაოდენობით აწარმოებდა ასევე ქერს, სიმინდსა და მზესუმზირას.
უკრაინას აზოვის ზღვაზე გასავლელი ჩაეკეტა, შავ ზღვაზე გასასვლელი ბლოკირებულია. საგაზაფხულო ხვნა-თესვის სამუშაოები შეფერხებით მიმდინარეობს, რაც მოსავლის კლების გარანტიად შეიძლება იქნას აღქმული.
თუ არ ჩავთვლით ცალკეულ სამხედრო ობიექტებზე თავდასხმებს, რუსეთის ტერიტორიაზე ომი არ არის, მაგრამ სანქციების ფონზე სავაჭრო ურთიერთობები შეზღუდულია.
მოსალოდნელი სასურსათო კრიზისის ფონზე ექსპორტს ზღუდავს კიდევ ერთი მსხვილი მწარმოებელი - ყაზახეთიც.
საწვავის გაძვირების გამო, მარცვლეულის მოყვანის ხარჯი რეგიონის გარეთ მდებარე სახელმწიფოებშიც გაიზარდა. ბუნებრივი გაზის გაძვირების გამო გაზრდილია სათბურში მოყვანილი პროდუქციის ფასებიც.
სურსათის გაძვირება ყველაზე მეტად ღარიბ ადამიანებს აზარალებს. ისინი ან საკვების გარდა ვეღარაფერს ყიდულობენ, ან საკვების შეძენაზეც პრობლემა ექმნებათ. 2019 წელს პანდემიამდე, პირველად ისტორიაში უკიდურესი სიღარიბის ზარს მიღმა მყოფთა პროცენტული მაჩვენებელი 10%-ს ჩამოსცდა. 2020 წელს პანდემიამ და კოვიდრეგულაციებმა სიღარიბე ისევ გაზარდა. 2021 აღდგენისთვის საკმარისი არ აღმოჩნდა. 2022 წელს კი ევროპაში მეორე მსოფლიო ომის შემდეგ ყველაზე დიდი ომი დაიწყო.
საქართველოში მოხმარებული ხორბლის 90%-ზე მეტი იმპორტირებულია, ძირითადად რუსეთიდან. მიუხედავად იმისა, რომ რუსეთს საქართველო არამეგობრული ქვეყნების სიაში არ შეუყვანია, იმპორტიორებს მარტში მაინც რუბლში ანგარიშსწორება მოსთხოვეს. აპრილის ფასების მონაცემებს საქსტატი 3 მაისს გამოაქვეყნებს, მარტში კი იმავე უწყების ცნობით, პური გასული წლის ანალოგიურ მაჩვენებელთან შედარებით 25%-ით გაძვირდა. ასევე მარტში სოციალური შემწეობის მიმღებთა რაოდენობამ ისტორიულ მაქსიმუმ 652 ათასს მიაღწია.