უკრაინის ომი არის „კატასტროფა“ მსოფლიოსთვის, რომელიც გლობალურ ეკონომიკურ ზრდას შეაფერხებს. ამის შესახებ მსოფლიო ბანკის პრეზიდენტი, დევიდ მალპასი BBC-სთან ინტერვიუს დროს აცხადებს.
„უკრაინის ომი მსოფლიოსთვის ცუდ დროს მიმდინარეობს, რადგან ინფლაცია ისედაც მზარდია,” - ამბობს მალპასი.
მისი თქმით, ყველაზე მეტად ადამიანური მსხვერპლი აღელვებს, ხოლო ომის ეკონომიკური გავლენა უკრაინის საზღვრებს სცდება. ენერგეტიკაზე გლობალური ფასების ზრდა „ყველაზე მეტად ღარიბებსა და ინფლაციას ურტყამს.“
დევიდ მალპასის მონაცემებით, ომმა, ასევე, სურსათის ფასები გაზარდა, რაც არის „მეტად რეალური პრობლემა ღარიბი ქვეყნების მოსახლეობისთივს. ის ამბობს, რომ რუსეთიც და უკრაინაც საკვები პროდუქტების მსხვილი მწარმოებლები არიან. S&P Global Platts-ის თანახმად, უკრაინა მსოფლიოში მზესუმზირის ზეთის უმსხვილესი მწარმოებელია, რუსეთი კი მეორე ადგილზეა. ამასთან, ორივე ქვეყანა გლობალური წარმოების 60%-ს შეადგენს.
JP Morgan-ის მონაცემებით, ხორბლის გლობალურ ექსპორტში უკრაინისა და რუსეთის საერთო წილი 28,9%-ია. ხორბლის ფასები ჩიკაგოს ფიუჩერსების ბირჟაზე 14 წლის მაქსიმუმზეა. უკრაინა ზეთის ყველაზე დიდი მწარმოებელია მსოფლიოში, მაგრამ ომმა მისი ექსპორტი შეაჩერა, რადგან ქვეყნის პორტები დაიკეტა. ასევე, ფართო სანქციების გამო, ამ პროდუქტის მიწოდება რუსეთიდანაც შეიზღუდა.
„არ არსებობს გზა, რომ უკრაინიდან და რუსეთიდან მიწოდების შეწყვეტას საკმარისად სწრაფად მოვერგოთ და ეს სიტუაცია ფასებს გაზრდის,“ - ამბობს დევიდ მალპასი.
მისი თქმით, ვლადიმერ პუტინის მთავრობამ შესაძლოა, ევროპის ენერგეტიკული ბაზარი სამუდამოდ დაკარგოს, რადგან ევროკავშირი ცდილობს, ენერგეტიკის სხვა წყაროებზე გადასვლა დააჩქაროს. მალპასის შეფასებით, ომის შედეგად შემოსავლის ამ მოცულობის დაკარგვა არის მხოლოდ ერთ-ერთი მიმართულება, რაც რუსეთში ცხოვრების დონეს დაარღვევს, ამას კი რუბლის ღირებულების დაცემა და ინფლაცია მოყვება.
მისი თქმით, 2014 წლის რევოლუციის შემდეგ, მსოფლიო ბანკმა უკრაინის ეკონომიკის განვითარებისთვის 7,9 მლრდ დოლარი გამოყო. ეს თანხა ქვეყანას ფართო ეკონომიკური რეფორმების დანერგვაში, ენერგეტიკისა და საბანკო სექტორების პრივატიზაციაში, ასევე, სოფლის მეურნეობის პროდუქტიულობის გაზრდაში დაეხმარა.
რუსეთის შეჭრამდე ერთი თვით ადრე, უკრაინის ცენტრალური ბანკი პროგნოზირებდა, რომ ქვეყნის ეკონომიკა, პანდემიის სირთულეების შემდეგ, მიმდინარე წელს 3,4%-ით, 180 მლრდ დოლარით გაიზრდებოდა.
დევიდ მალპასი შეშფოთებულია, რომ ომი გრძელვადიან ზიანს მოუტანს იმ ცვლილებებს, რითიც მანამდე უკრაინის ეკონომიკამ და მოსახლეობამ ისარგებლა. ამდენად, მსოფლიო ბანკი უკრაინისთვის 350 მლნ დოლარის დახმარების პაკეტს ამზადებს, რასაც რამდენიმე დღეში დაამტკიცებს.
„ეს ხელს შეუწყობს უკრაინის ბიუჯეტის დაფინანსებას ომით გამოწვეული საგადასახადო შემოსავლების კოლაფსის პირობებში და ქვეყანას სამთავრობო ხელფასების, სოციალური კეთილდღეობისა და გადაუდებელი შემწეობების გასტუმრებაში დაეხმარება,“ - აცხადებს მალპასი.
BPN.GE