„ჩემპიონატმა ჩაიარა ბრწყინვალედ, დიდებულად, ეს იყო ყველაზე დიდი ღონისძიება საქართველოში“ - ასე აფასებს დაიცავი მთის კურორტების დამფუძნებელი და საქართველოს მთის  კურორტების ბიზნეს ასოციაციის  პრეზიდენტი  გიორგი სალუქვაძე მსოფლიო ჩემპიონატს, რომელიც ბაკურიანში, ჩატარდა, მისი თქმით ეს იყო ძალიან მასშტაბური  ღონისძიება და გამოწვევა იყო ძალიან დიდი, თუმცა მიუხედავად ამისა,  კურორტმა საერთაშორისო ტრენერებისგან, ათლეტებისგან და დელეგატებისგან დადებითი შეფასება მიიღო.

„ეს იყო ძალიან მასშტაბური ღონისძიება, გამოწვევა იყო ძალიან სერიოზული და რა თქმა უნდა ალბათობა  იმისა, რომ ვერ მოერიო და გაუმკლავდე ასეთი ტიპის ღონისძიებას ყოველთვის არსებობს, მითუმეტეს მაშინ, როდესაც საქართველო ამ კუთხით გამოცდილი ქვეყანა არ არის.  ყველა ძალიან ღელავდა, მაგრამ დელეგატების დადებითი შეფასების შემდეგ საორგანიზაციო კომიტეტს ამოსუნთქვის საშუალება მიეცა.

როცა დელეგატი იძახის, რომ ინფრასტრუქტურა ფანტასტიკურად არის მოწყობილი ეს ასეა,  როცა ათლეტი კმაყოფილია, როცა  ტრენერი  კმაყოფილია  ესე იგი  ყველაფერი  წესრიგშია,  სხვა საორგანიზაციო  ნაწილშიც მივიღეთ დადებითი შეფასება.

რაც შეეხება ტრასებს,  ნამდვილად მქონდა სიმშვიდის  საფუძველი,  რადგან  ჩვენ  გვაქვს  ოლიმპიელი  ჩემპიონების  კომენტარები თუ როგორ  აფასებენ  ტრასებს“, - აღნიშნა გიორგი სალუქვაძემ.

რაც შეეხება ზოგადად ბაკურიანს, სალუქვაძე აღნიშნავს, რომ მოუხედავად  ჩემპიონატის  წარმატებით  ჩატარებისა ბაკურიანი გაპარტახებულია, შენობები არალოგიკურად არის აშენებული და კურორტზე თავისუფალი სივრცე არ არსებობს.

„მე ეჭვი მეპარება  რომ  აქ ერთხელ ჩამოსულ ტურისტს  მეორედ  მოუნდეს  ჩამოსვლა. მალბათ მე კიდევ უფრო  ვრწმუნდები, იმაში  რომ ამაზე მუშაობა  უნდა დაიწყოს,, იერსახეს  უნდა  ეშველოს. ჩვენი  ჩვენი კურორტები  ეს არის ღვთის საჩუქარი და ჩვენ ამას არ ვუვლით.

აღსანიშნავია  ისიც, რომ ამინდმა  თავის  ქნა,  მაყურებელი  დააფრთხო, თუმცა ვერც იმას  ვიტყვი  რომ ჩემპიონატს  მაყურებელი  არ ჰყავდა.  მაყურებელი იყო და დაინტერესებაც  ძალიან მაღალი იყო.

აპარტოტელების მეპატრონეებს ჰქონდათ მოლოდინი, რომ ბაკურიანი გადაიჭედებოდა, თუმცა ეს ასე  არ მოხდა, რადგან იმდენად დიდია მიწოდება, რომ მსოფლიო ჩემპიონატიც, რომ ჩაატარო ბაკურიანში, სრული დატვირთვა ვეღარ მოხდება. ამას  თავად ის  ხალხიც მიხვდა ვინც ნომრებს აქირავებს. აბსოლუტურად დარღვეულია მოთხოვნა-მიწოდება.  სწორედ ამიტომ უნდა შეიქმნას ბალანსი და დაიდოს გეგმა თუ როგორი უნდა იყოს ბაკურიანი ათ წელიწადში და იქამდე აღარ მოხდეს აღარც  მიწის გაყიდვა და აღარც  სამშენებლო ნებართვის გაცემა, რადგან ასეთ ქაოტური მშენებლობები აღარ შეიძლება და მეპატრონემ რომ რაღაც სარგებელი ნახოს, ამას ვერანაირი ოლიმპიადა ვეღარ უშველის“ -  აღნიშნა გიორგი სალუქვაძემ.

თაკო კვაჭანტირაძე