კონცერნი Toyota გახდა პირველი უცხოური ავტომწარმოებელი, რომელმაც ქვეყნიდან წასვლის შემდეგ, რუსეთში სათადარიგო ნაწილების მიწოდება განაახლა.
ამის შესახებ The Moscow Times-ი წერს.
2022 წლის ბოლოდან Toyota Motor-მა განაახლა კომპონენტების პირდაპირი მიწოდება მანქანების საგარანტიო შეკეთებისა და მათი მოვლისთვის, ასევე დაუშვა პარალელური იმპორტი ოფიციალური დილერებისთვის, - ნათქვამია წერილში, რომელიც კომპანიის სათადარიგო ნაწილების მიწოდებისა და საწყობის ოპერაციების დეპარტამენტის გენერალურმა მენეჯერმა ანდრეი შჩერბაკოვმა სასამართლოს გაუგზავნა.
დოკუმენტი წარდგენილი იქნა სასამართლოში, რომელიც „მომხმარებელთა ინიციატივების საზოგადოებისა“ და „როსპოტრებნადზორის“ სარჩელს განიხილავს, ისინი ტოიოტა მოტორს მომხმარებელთა უფლებების დარღვევას ედავებიან. რუსი ჩინოვნიკები მოითხოვენ, რომ ტოიოტამ განაახლოს სათადარიგო ნაწილების მიწოდება.
როგორც ცნობილია, სხვა უცხოური ავტომწარმოებლების მსგავსად, Toyota-მ დახურა თავისი ქარხანა და შეწყვიტა მანქანებისა და კომპონენტების მიწოდება რუსეთისთვის, რუსეთის უკრაინაში შეჭრისა და საომარი მოქმედებების ფონზე.
ავტომწარმოებელი ირწმუნება, რომ ისინი იღებენ ყველა შესაძლო ზომას რუსეთში სადილერო ქსელის მუშაობის მხარდასაჭერად და რუსი მომხმარებლების ინტერესების დასაცავად.
„ზოგიერთი ნაწილის მიწოდება განახლებულია სატესტო რეჟიმში საგარანტიო რემონტისა და უკან გაწვევის კამპანიებისთვის (მწარმოებელი უკან იწვევს პროდუქტებს დეფექტების აღმოსაფხვრელად)“ - აცხადებენ „ტოიოტა მოტორსის“ პრესსამსახურში.
ამჟამად ყველა ავტობრენდის დილერები იყენებენ სათადარიგო ნაწილებს, რომლებიც შემოიტანეს პარალელური იმპორტით.