მსოფლიოს ყველაზე დიდი სატვირთო საჰაერო ხომალდის განადგურებიდან ერთი წელი გავიდა. ერთადერთი An-225 Mriya 2022 წლის 27 თებერვალს, რუსმა აგრესორებმა უკრაინაში შეჭრის შემდეგ გოსტომელის აეროდრომში, საკუთარ ანგარში გაანადგურეს. ბორტი რუსი ოკუპანტების საჰაერო თავდასხმის შედეგად დაიწვა.

თვითმფრინავს პირველად თავს 24 თებერვალს დაესხნენ. FlightRadar-ის მონაცემებით, 5 თებერვლის შემდეგ თვითმფრინავი გოსტომელის აეროდრომზე იდგა. 27 თებერვალს კი უკრაინულმა მხარემ ოფიციალურად დაადასტურა, რომ საჰაერო ხომალდი განადგურდა.

AN-225-ის სატვირთო კაბინაში შესაძლებელია მოთავსდეს 50 ავტომობილი. მისი წონა ტვირთის გარეშე 250 ტონაა, ხოლო მაქსიმალური დატვირთვით 600 ტონა. საჰაერო ხომალდის საშუალო სიჩქარე 700 კმ/სთ-ია, ხოლო მაქსიმალური – 850კმ/სთ.

2022 წლის თებერვლის ბოლომდე  მსოფლიოში მხოლოდ ერთი AN-225 არსებობდა და ის უკრაინული ავიაკომპანია და თავისივე მწარმოებლის Antonov Airlines-ის კუთვნილება იყო.

An-225 Mriya-ს აღდგენა/მშენებლობისთვის უკრაინამ სპეციალური ფონდიც კი დააფუძნა. Antonov-ში აცხადებდნენ, რომ მსოფლიო საავიაციო ფლოტის ფლაგმანი​ს Mriya-ს აღდგენისთვის საჭიროა საპროექტო და სამეცნიერო-ტექნიკური დოკუმენტაცია, მაგრამ არ არის საკმარისი თანხა.

2022 წლის აპრილის ბოლოს უკვე ცნობილი გახდა, რომ მსოფლიოში ერთ-ერთი ყველაზე დიდი და მძლავრი თვითმფრინავის აღდგენა იგეგმებოდა. უკრაინაში იყო AN-225 Mriya-ს დაუმთავრებელი მეორე ასლის ფუზელაჟი. უკრაინული მედია წერდა, რომ მეორე Mriya-ს დასასრულებლად საჭიროა 700 მლნ დოლარიდან 1 მლრდ დოლარამდე.

აპრილშივე გაჟღერდა, რომ თურქეთი მეორე An-225 Mriya-ს დასრულებას განიხილავდა. ის, რომ თურქული მხარე მეორე „ოცნების“ მშენებლობის დასრულებით იყო დაინტერესებული აღნიშნულის შესახებ ინფორმაცია უკრაინის მაშინდელმა ვიცე-პრემიერმა, უკრაინის სტრატეგიული მრეწველობის მინისტრმა ოლეგ ურუსკიმ გაასაჯაროვა.

უკრაინამ მოახერხა და ომის მიუხედავად საჰაერო ხომალდის მშენებლობის პროცესი დაიწყო. მეორე An-225 Mriya, რომელიც ლეგენდარულ „ოცნების“ ლაინერს ჩაანაცვლებს უზრუნველყოფილი იქნება როგორც ახალი, ასევე დაზიანებული თვითმფრინავის ნაწილებით.

ჯერ კიდევ 2022 წლის ნოემბერში Antonov-ის სახელმწიფო საწარმოს გენერალურმა დირექტორმა ევგენი გავრილოვმა განაცხადა, რომ ახალი Mriya უკვე 30%-ით მზადაა. სამუშაო ფარულ ადგილას მიმდინარეობს.

ცნობილია, რომ მეორე „ოცნების“ დაფინანსების მოძიებაში უკრაინას ლაიფციგის/ჰალის საერთაშორისო აეროპორტიც ეხმარება. რუსების მიერ განადგურებული An-225 აღნიშნული აეროპორტის ხშირი სტუმარი იყო. გარდა ამისა, ავიაკომპანია Antonov-ი სწორედ ამ აეროპორტშია, დროებით, ბაზირებული.