საკონსულტაციო კომპანია Brand Finance-მა მსოფლიოში ყველაზე ძვირი, ყველაზე ძლიერი და ყველაზე სწრაფად ზრდადი ბრენდების რეიტინგი წარადგინა.
სულ სიაშია 500 ბრენდია და ყველაზე ძვირი ბრენდების ხუთეული მთლიანად ამერიკულია - მასში შევიდნენ Apple ($355 მლრდ. +35%), Amazon ($350 მლრდ.,, +37%), Google ( $263 მლრდ +37%), Microsoft ($184 მლრდ, +31%), და მსოფლიოს უმსხვილესი სავაჭრო ქსელი, ამერიკული Walmart ($112 მლრდ. +20,5%).
მთლიანი ღირებულების კუთხით, ყველაზე ძვირი დარგია მაღალი ტექნოლოგიები - ამ სექტორში მოქმედი ბრენდების ჯამური ღირებულება 1,3 ტრლნ. დოლარია და პანდემიამ ეს ტენდენცია კიდეც უფრო გააძლიერა.
მეორე ადგილზეა საცალო ვაჭრობა - 1 ტრლნ. დოლარი. ეს სექტორი პანდემიამდე მე-3 ადგილზე იყო და მას საბანკო სფერო უსწრებდა, მაგრამ ბოლო 2 წლის მანძილზე სავაჭრო ბრენდების ჯამური ღირებულება 46%-ით გაიზარდა.
ზრდა დაფიქსირდა ასევე ფარმაცევტულ ბრენდებშიც, განსაკუთრებით ეს კოვიდ-ვაქცინების მწარმოებლებს ეხება - 147-ე ადგილი დაიკავა Johnson & Johnson-მა ($13,4 მლრდ., +24%)., 404-ე AstraZeneca-მ ($5,6 მლრდ, +77%), 352-ზე Pfizer ($6,3 მლრდ., +58%).
ყველაზე ძლიერი ბრენდების კატეგორიაში ფასდება ინვესტიციები მარკეტინგში, აქციონერული კაპიტალის ხარისხი და ბიზნესის ეფექტიანობა. უძლიერესი ბრენდების ხუთეულში შევიდნენ ჩინური WeChat, Coca-Cola, Google, YouTube და კორეული საძიებო სისტემა Naver.
ამ კატეგორიაში მე-6 ადგილი დაიკავა რუსულმა „სბერბანკმა“, რომელმაც ბრენდის სიძლიერის კუთხით იტალიურ Ferrari-ს გაუსწრო. ყველაზე სწრაფად ზრდადი ბრენდების სიაში პირველი ადგილი დაიკავა ჩინურმა TikTok-მა - მისი კაპიტალიზაცია 2020 წლის შემდეგ 3-ჯერ - 18,7-დან 59 მლრდ, დოლარამდე გაიზარდა. ამის წყალობით მან უძვირესი ბრენდების რეიტინგში მე-18 ადგილი დაიკავა. ამის ხელშემწყობი ერთ-ერთი ფაქტორი სწორედ პანდემიაა - კოვიდ-შეზღუდვების დროს, რომლებიც გაგრძელდა თითქმის მთელი 2020 წელი და 2021 წლის დიდ ნაწილში, სოციალური მედია და ციფრული გართობის სერვისები სტაბილურად იზრდებოდა.
TikTok-ის სწრაფი ზრდა მეტყველებს მედიაკონტენტის მოხმარების ცვლილების ტენდენციებზე - ის მომხმარებლებს მარტივ და მსუბუქ გართობას სთავაზობს და ამით პოპულარობა მთელს მსოფლიოში მოიპოვა.
ამასთან, ის ლოკდაუნის დროს ადამიანებს ერთმანეთთან ურთიერთობების საშუალებას აძლევს - მიიჩნევენ Brand Finance-ის ექსპერტები. სწრაფად ზრდადი ბრენდების ხუთეულში ასევე მოხვდნენ Snapchat (+184%), სამხრეთ კორეული მესენჯერი და სოციალური ქსელი Kakao (+161%), პროცესორების ამერიკული მწარმოებელი AMD ( +122%) და ჩინური ავტომწარმოებელი BYD (+100%).