იანვრიდან ახალი აზიური რეგიონალური სავაჭრო პაქტი, ყოვლისმომცველი რეგიონული ეკონომიკური პარტნიორობა, ანუ RCEP (Regional Comprehensive Economic Partnership) ძალაში შევიდა. პორტალ FreshPlaza-ს ცნობით, ეს არის მსოფლიოში ყველაზე დიდი შეთანხმება თავისუფალი ვაჭრობის შესახებ, რომელიც ევროკავშირის, ტრანს-წყნარი ოკეანის პარტნიორობის, სამხრეთ ამერიკისა და ბოლოდროინდელ აშშ-მექსიკა-კანადის თავისუფალი ვაჭრობის შეთანხმებებს აღემატება.

RCEP მოიცავს სამხრეთ-აღმოსავლეთ აზიის ქვეყნების ასოციაცია ASEAN-ის ყველა ქვეყანას, როგორებიც არის ტაილანდი, სინგაპური, მიანმარი, ინდონეზია, მალაიზია, ლაოსი, ვიეტნამი, ბრუნეი, ფილიპინები და კამბოჯა. მათ ემატება იაპონია, სამხრეთ კორეა, ავსტრალია, ახალი ზელანდია და ჩინეთი.

გასულ წელს ინდოეთი მოლაპარაკებებს იმ საფრთხეების გამო გამოეთიშა, რომ ის თავისი შიდა ინდუსტრიისა და სოფლის მეურნეობის სექტორის დაცვას ვერ შეძლებდა. ინდოეთის გამორიცხვა ბლოკის მასშტაბს, დაახლოებით, 1,4 მილიარდი ადამიანით ამცირებს. თუმცა პაქტზე ხელმომწერთა განცხადებაში ნათქვამია, რომ „კარი ჯერ კიდევ ღიაა ინდოეთისთვის და მისასალმებელი იქნება, რომ ის ბლოკს შეუერთდეს.“

RCEP-ის 15 მონაწილე, დაახლოებით, 2,3 მილიარდ ადამიანს შეადგენს, რაც მსოფლიოს მოსახლეობის, დაახლოებით, 30%, ხოლო მშპ-ის მოცულობა 28,5 ტრლნ დოლარია.

ახალი რეგიონალური სავაჭრო ბლოკი რეგიონის საქონლის 91%-ს ტარიფებს მოუხსნის, წაახალისებს ერთიანი ბაზრის შექმნას, დააკოდიფიცირებს ინტელექტუალურ საკუთრებასა და ელექტრონულ კომერციას, ასევე, საინვესტიციო წესების სტანდარტიზებას მოახდენს.

BPN.GE