საქართველოს უძრავი ქონების ბაზარი უცხოელებისთვის მიმზიდველებას კარგავს. თუკი რამდენიმე წლის წინ ვსაუბრობდით, რომ უცხო ქვეყნის მოქალაქეები ჩვენი ქვეყნის უძრავი ქონების მიმართ დიდ ინტერესს იჩენდნენ და ბაზარზე მაღალი აქტიურობით გამოირჩეოდნენ, ეს მიმზიდველობა ბოლო წლების განმავლობაში ნამდვილად არ შეიმჩნევა. როგორც FINDARTES International Real Estate -ის გაყიდვების დირექტორი დავით გრიგალაშვილი „კომერსანტთან“ საუბრისას აცხადებს, უცხოელების ის ნაწილი, რომელსაც სხვადასხვა დროს საქართველოში არასასოფლო სამეურნეო მიწებს და სხვა ტიპის უძრავ ქონებას ფლობდა, ბაზრიდან გასვლას ცდილობს.

,,არასასოფლო დანიშნულების მიწების გაყიდვები გახშირდა. ამ მხრივ განსაკუთრებით უცხოელები აქტიურობენ. შეიძლება ითქვას, ყოველი 100 ადამიანიდან, ვისაც უძრავი ქონების გაყიდვა სურს, 70% უცხო ქვეყნის მოქალაქეა. ეს ის კატეგორიაა, ვინც წლების წინ შეძენილ ქონებას ჰყიდის და ტოვებს საქართველოს. ტენდენცია შესამჩნევია როგორც თბილისში, ასევე რეგიონებშიც, განსაკუთრებით კახეთსა და აჭარაში, სადაც ერთ დროს ძალიან  მაღალი მოთხოვნა იყო. მაგალითისთვის, თუკი პანდემიამდე ირანელები აქტიურობდნენ, უკვე მიდიან და თურქეთში ყიდულობენ უძრავ ქონებას. აჭარის რეგიონი ძირითადად უკრაინელებსა და რუსებზე იყო გათვლილი, მაგრამ უკვე ისინიც აღარ შემოდიან. ბევრს ჰქონდა უძრავი ქონება შეძენილი ,,ორბში“, მაგრამ უკვე გაყიდვას ცდილობენ. პანდემიამ ამ ბიზნესს ძალიან შეუშალა ხელი. თამამად შეიძლება თქმა, რომ საქართველოს უძრავი ქონების ბაზარი უცხოელებისთვის უკვე აღარ არის მიმზიდველი. ეს განპირობებულია შეზღუდვებითაც, რაც ქვეყანამ უცხოელი მოქალაქეებისთვის დააწესა“, - ამბობს დავით გრიგალაშვილი ,,კომერსანტთან“.

ცნობისთვის,  FINDARTES International Real Estate უძრავი ქონების სერვისების სფეროში პროფესიონალთა გუნდს და დეველოპერებს წარმოადგენს და  უძრავი ქონების მფლობელებსა და საცალო მომხმარებლებს მაღალკვალიფიციურ მომსახურებას სთავაზობს.

FINDARTES ქართულ ბაზარზე 2016 წლიდან ფუნქციონირებს. კომპანიის სერვისი გულისხმობს სტრატეგიულ კონსულტაციას, გაყიდვების „აუთსორსინგს“ , პროექტების მარკეტინგს, მენეჯმენტს და კვლევებს.

როგორც ცნობილია, 2021 წლის 12 მაისიდან საქართველოს კანონში “უცხოელთა და მოქალაქეობის არმქონე პირთა სამართლებრივი მდგომარეობის შესახებ” ცვლილებები შევიდა. ახალი რეგულაციებით უცხოელებისთვის ბინადრობის ნებართვის მიღების პირობები კიდევ უფრო გამკაცრდა. 

კანონპროექტს, რომლის ინიციატივა 2021 წლის 4 თებერვალს საქართველოს პარლამენტის წევრ მიხეილ სარჯველაძეს ეკუთვნის, სამივე მოსმენით ეყარა კენჭი და ორი თვის ვადაში, მალევე დამტკიცდა. 

შეგახსენებთ, რომ საქართველოს მოქმედი კანონმდებლობით,მიწის გასხვისება აკრძალულია პირზე, რომელსაც არ გააჩნია საქართველოს მოქალაქეობა.

მარი ჩიტაია