დეველოპერულ კომპანია „არსში“ ელიან, რომ საცხოვრებელ უძრავ ქონებაზე ფასები მომავალშიც მზარდი იქნება.

როგორც კომპანიაში „ბიზნეს ფორმულას“ განუცხადეს, მართალია ბოლო პერიოდში სამშენებლო მასალებზე ფასები დასტაბილურდა, თუმცა გასული თვეების განმავლობაში მშენებლობის გაზრდილი თვითღირებულება ბინების ფასში სრულად არაა ასახული. შესაბამისად, მოსალოდნელია, რომ როგორც წლის ბოლომდე, ასევე მომავალ წელს საცხოვრებელი ბინები დამატებით გაძვირდება.

ამასთან, „არსის“ გენერალური დირექტორის განცხადებით, თუკი მომავალ წელს მიგრანტების მხრიდან მოთხოვნა გასაყიდ ბინებზეც მაღალი იქნება, ეს ფასებს კიდევ უფრო გაზრდის.

„წლის დასაწყისში ბინებზე ფასების ზრდის მთავარი მიზეზი გაძვირებული სამშენებლო მასალები იყო, ეს ტენდენცია წლის განმავლობაშიც გაგრძელდა. თუმცა მოთხოვნა არ შემცირებულა, რასაც მათ შორის ხელი შეუწყო იმ ფაქტორმა, რომ მიგრანტების მიერ გაზრდილმა მოთხოვნამ ქირის ნაწილში ბიძგი მისცა უფრო მეტი ბინის საინვესტიციოდ, ანუ შემდგომი გაქირავების მიზნით გაყიდვას. მთავარი ფაქტორი გაძვირების ნაწილში მაინც გაზრდილი თვითღირებულებაა. ჩვენ ვნახეთ, რომ მშენებლობის თვითღირებულება დაახლოებით 20-25%-ით გაიზარდა, ამის პარალელურად კი ბინები ჯამურად 10%-ის ფარგლებშია გაძვირებული. ეს კომპანიებმა საკუთარი მოგების მარჟების ხარჯზე მოახერხეს. თუმცა ასე ვეღარ გაგრძელდება და შესაბამისად, უნდა ველოდოთ, რომ წლის ბოლომდე ბინები კიდევ დაახლოებით 5%-ით გაძვირდება. მომავალ წელს თუკი ისევ რაიმე განსაკუთრებული ფაქტორი არ დაემატა, ზრდა კიდევ 5-10%-ის ფარგლებში იქნება. თუმცა თუ მიგრანტების მხრიდან მოთხოვნა გასაყიდ ბინებზეც გაიზრდება, ეს სავარაუდოდ, ფასებზე დამატებითი ზეწოლა იქნება“, - განაცხადა ბესო ორთოიძემ.

ცნობისთვის, “თიბისი კაპიტალის” მოლოდინით, 2023 წელს გასაყიდ უძრავ ქონებაზე ფასი დამატებით 14%-ით გაიზრდება. როგორც ანალიტიკური ორგანიზაციის კვლევაშია აღნიშნული, მომავალ წელს საცხოვრებელი უძრავი ქონების გაძვირების მთავარი მიზეზი მიგრაციით გამოწვეული გაზრდილი მოთხოვნა იქნება. ამასთან, ორგანიზაციის ინფორმაციით, წელს საცხოვრებელი ბინების ფასი ჯამურად 16%-ით იქნება გაზრდილი, მათ შორის აგვისტოში წლიური 27%-იანი ზრდა დაფიქსირდა.

წყარო: businessformula.ge