ეროვნული ბანკი ციფრული ლარის პროექტის შემდეგ ეტაპზე გადადის და ტექნიკური პარტნიორი კომპანიების მოწვევას ასრულებს. პროექტის პირველი ეტაპის საბოლოო ვადად 2023 წლის 15 თებერვალი განისაზღვრა. პირველი ეტაპის დასრულების შემდგომ, ეროვნული ბანკი შეარჩევს ცენტრალური ბანკის ციფრული ვალუტის ტექნოლოგიის მიმწოდებელ კომპანიას და სიღრმისეულად შეაფასებს ტექნოლოგიური პარტნიორების მიერ წარმოდგენილ ცენტრალური ბანკის ციფრული ვალუტის სისტემურ მოწყობასა და სხვა დამატებით ინფორმაციას, მათ შორის, სისტემურ მოწყობას ციფრული ლარის საცდელი ვერსიის დასანერგად.

„ფინტექ ასოციაციის“ თავმჯდომარე დავით კიკვიძე „კომერსანტთან“ ამბობს, რომ ციფრული ვალუტის მთავარი იდეა და სარგებელი ისაა, რომ საბანკო სექტორზე დამოკიდებულება შემცირდება.

„საერთაშორისო ორგანიზაციების გარდა, ქართული ფინტექ კომპანიების მხრიდან დაინტერესება დიდია. როგორც ჩემთვის არის ცნობილი ეროვნულ ბანკს აქვს უკვე გადაწყვეტილი თუ ვისთან და რა ტიპის კომპანიასთან ითანამშრომლებს. 15 თებერვლის შემდეგ დაიწყება სატესტო რეჟიმი სადაც ქართული კომპანიები იქნებიან ჩართულები, რადგან ნებისმიერ შემთხვევაში ციფრული ლარის გამტარები, დისტრიბუტორები იქნებიან ქართული ფინტექ კომპანიები, რომლებმაც უნდა უზრუნველჰყონ ტექნიკური გადაწყვეტა და ინტეგრაცია იმ არსებულ სისტემასთან რომელსაც ეროვნული ბანკი წარადგენს. 

არის ხოლმე კითხვა, მაშინ როდესაც მსოფლიოს რამდენიმე ქვეყანაში გამოიყენება ციფრული ვალუტა და იქაც სატესტო რეჟიმშია, არის თუ არა დრო მისი საქართველოში დანერგვისთვის? — აქაც აზრი ხშირად ორად იყოფა, მაგრამ ვფიქრობ, რომ სწორედ ის შეიძლება გახდეს მთავარი მამოძრავებელი, რომ უცხოურ ვალუტაზე და იმპორტზე დამოკიდებულება, ასევე არასტაბილური ინფლაციური გარემოს რისკები გარკვეულწილად დააზღვიონ. გარდა ამისა, ყველაზე მნიშვნელოვანი, საბანკო სექტორზე ეკონომიკის 80%-იანი დამოკიდებულება შეიცვალოს და საზოგადოებას ალტერნატივა ჰქონდეს. უკვე არაერთი ქვეყანა მუშაობს ციფრული ლარის დანერგვაზე, მთავარი იდეა და სარგებელი ისაა, რომ საბანკო სექტორზე დამოკიდებულება შემცირდება.

CBDC (ცენტრალური ბანკის ციფრული ვალუტა) კლასიკური კრიპტოვალუტებისთვის სახელმწიფოს პასუხია. მთავრობებმა დაინახეს რომ, კრიპტოვალუტის ასე პირდაპირ აკრძალვა, შეჩერება და შეზღუდვების დაწესება უბრალოდ არ შველის მათ განვითარებას. სწორედ ამის გამო შექმნეს ციფრული ვალუტა, შესაბამისად მის განვითარებას უფრო გრძელვადიან პერსპექტივაში ვხედავ, მას ფიზიკურად არ შეუძლია საბანკო სექტორის მონსტრის ასე პირდაპირ, მოკლე ვადაში ჩანაცვლება“, — ამბობს დავით კიკვიძე. 

დღეისათვის ჩინეთს, კარიბის ზღვის აუზის ქვეყნებს, იაპონიას და ევროპის წამყვან ქვეყნებს აქვთ გამოშვებული ციფრული ვალუტა და ის სატესტო რეჟიმშია. აღსანიშნავია, რომ ამ ეტაპზე მსოფლიოში ცენტრალური ბანკების 85% უკვე მუშაობს ციფრულ ვალუტაზე, ზოგიერთი კი კვლევით ეტაპზეა.