მას შემდეგ, რაც კახი კალაძემ ქართული სამშენებლო კომპანიების ნაწილი უპასუხისმგებლობაში დაადანაშაულა, ექსპერტები იმ პრობლემებზე ალაპარაკდნენ, რომლის გამოც კომპანიები ინფრასტრუქტურულ ტენდერებში არ და ვერ იღებენ მონაწილეობას. ეკონომიკის დოქტორი ირაკლი მაკალათია მიიჩნევს, რომ პრობლემა ხელისუფლების და ბიზნესის „მეგობრობა“, ჩაწყობის ხარჯზე მოგებული ტენდერები და  კორუფციაა.

„მთავარი პრობლემა მაინც არის ის, რომ მთავრობასთან დაახლოებული კომპანია იმარჯვებს ტენდერებში და მერე ფინანსური სიძლიერე აქვს თუ არა, „ატკატები“ და მთელი კორუფციული რისკები იჩენს თავს. მთავრობა როდესაც არის ასეთი სერვისის მიმწოდებელი, მონოპოლიას როდესაც იღებ, არ აქვს მნიშვნელობა მთავრობა იქნება თუ კომპანია, იქ ხარისხი ეცემა და როდესაც მთავრობა არის მთავარი დამკვეთი და მთავარი შემსრულებელიც არის მთავრობა, იქ ხარისხიც ეცემა და კორუფციის რისკებიც იზრდება“, - აცხადებს მაკალათია.

ეკონომიკის დოქტორი „კომერსანტთან“ არსებულ გამოწვევებზე საუბრისას აცხადებს, რომ ხშირად ხდება ისეც, რომ  დაბალი ფინანსური შესაძლებლობების კომპანიების ნაწილი რისკავს და მონაწილეობას იღებს ამა თუ იმ პროექტის განსახორციელებლად გამოცხადებულ ტენდერებში.

„გარისკავს, აიღებს პასუხისმგებლობას და დაბალ ხარისხში შეასრულებს. იმისათვის, რომ იყოს კონკურენცია და ბევრი კომპანია გამოჩნდეს ბაზარზე, ამის შესაძლებლობა არ არის. რა კომპანიებიც არიან, ფინანსურად არ არიან იმ სიმძლავრის, იმ ტექნოლოგიებით აღჭურვილი, რომ ხარისხიანი შედეგი დადონ. ფინანსური სიძლიერე კი ნიშნავს იმას, რომ მათი ხარისხიც გაიზრდება, ახალ ტექნიკას, ტექნოლოგიებს, რომ შეიძენენ გააუმჯობესებენ ხარისხს, მაგრამ ამის შესაძლებლობა არ აქვთ“, - აცხადებს მაკალათია.

ირაკლი მაკალათიამ ქართულის ალტერნატივად, ინფრასტრუქტურული პროექტების შესასრულებლად უცხოური კომპანიების შემოყვანაზეც ისაუბრა.

რაც შეეხება უცხოურ კომპანიებს, უცხოური კომპანია აპრიორში არ ნიშნავს იმას, რომ იქნება კარგი კომპანია და ხარისხიანად შეასრულებს ამ სამუშაოს. მთავარია სწორად იქნეს განსაზღვრული და ისეთი კომპანია შემოიყვანონ, რომელიც მაღალ სტანდარტებში შეასრულებს ამა თუ იმ ინფრასტრუქტურულ პროექტს“, - განმარტავს მაკალათია.

შეგახსენებთ, რომ თბილისის მთავრობის სხდომაზე დედაქალაქის მერმა ინფრასტრუქტურულ პროექტების განხორციელებასა და შესრულებაში არსებულ პრობლემებზე საუბრისას ქართული კომპანიები გააკრიტიკა.

„ ქართული კომპანიები ვერ იღებენ პასუხისმგებლობას აღნიშნული სამუშაოების ჩატარებაში, ვერ იღებენ პასუხისმგებლობას, რომ პირნათლად შეასრულონ თავიანთი მოვალეობა, შესაბამისად, საერთაშორისო საფინანსო ორგანიზაციების ჩართულობით, მოგვეცემა იმის შესაძლებლობა, რომ უცხოურმა კომპანიებმაც მიიღონ მონაწილეობა გამოცხადებულ ტენდერებში“, – განაცხადა 22 ნოემბერს კახა კალაძემ.