მთავრობა დასაქმების ხელშეწყობის  სახელმწიფო პროგრამისთვის 2023 წლის ბიუჯეტიდან 83 300 000 ლარს დახარჯავს. როგორც მთავრობის №17 დადგენილებაში წერია, დასაქმების ხელშეწყობის მომსახურებათა განვითარების 2023 წლის სახელმწიფო ქვეპროგრამის მიზანია ქვეყანაში შრომის ბაზრის აქტიური პოლიტიკისა და დასაქმების ხელშეწყობის მომსახურებათა განვითარება /განხორციელება.

„დასაქმების ხელშეწყობის მომსახურებათა განვითარების ქვეპროგრამა“, რომლის ბიუჯეტი 800 000 ლარით განისაზღვრა, ითვალისწინებს შრომის ბაზრის მართვის საინფორმაციო სისტემის განვითარებას.

ხოლო „სამუშაოს მაძიებელთა პროფესიული კვალიფიკაციის ამაღლების ქვეპროგრამის“ ბიუჯეტი 2 500 000 ლარით განისაზღვრა, რომლის ფარგლებში მოხდება სამუშაოს მაძიებელთა პროფესიული მომზადება, პროფესიული გადამზადება და კვალიფიკაციის ამაღლება. 

რაც შეეხება „საზოგადოებრივ სამუშაოებზე დასაქმების ხელშეწყობის ქვეპროგრამას“ ბიუჯეტი 80 მლნ ლარია. აღნიშნული ქვეპროგრამის ბენეფიციარები არიან არაუმეტეს 120 000 სარეიტინგო ქულის მქონე საარსებო შემწეობის მიმღები ოჯახის 18 წლიდან საპენსიო ასაკამდე მყოფი წევრები, რომლებიც არ არიან დასაქმებულები ან/და რეგისტრირებული თვითდასაქმებულები. 

ღონისძიებით სარგებლობის უპირატესი უფლება ენიჭებათ: სპეციალური საგანმანათლებლო საჭიროების მქონე პირებს; შშმ პირებს; დევნილებს; ლტოლვილებს; სოციალურად დაუცველ პირებს, რომელთა სარეიტინგო ქულა არ აღემატება 120 000-ს, დაბრუნებულ მიგრანტებს, რომელთა დაბრუნებიდან არ არის გასული 1 წელზე მეტი; ყოფილ პატიმართა რეაბილიტაციისა და რესოციალიზაციის პროგრამაში ჩართულ პირებს და მათი ოჯახის წევრებს; მსჯავრდებულთა პროფესიული მომზადებისა და გადამზადების ცენტრის ბენეფიციარებს, ომისა და თავდაცვის ძალების ვეტერანებსა და მათ ოჯახის წევრებს; სახელმწიფო ზრუნვის ქვეშ მყოფ 16-დან 18 წლამდე ასაკის პირებს; ქალებს; არასრულწლოვანთა განრიდების პროგრამაში ჩართულ არასრულწლოვან და სრულწლოვან 21 წელს მიუღწეველ პირებს; ეთნიკურ უმცირესობებს; ოჯახში ძალადობის და ტრეფიკინგის მსხვერპლ პირებს; მაღალმთიან რეგიონში მცხოვრებ სამუშაოს მაძიებლებს.