პრემიერ ღარიბაშვილის განცხადებით სამთავრობო გუნდი ინვესტორებთან დიდი ჰესების მშენებლობასთან დაკავშირებით მოლაპარაკებებს აწარმოებს. გეგმა მშენებლობის პროცესში სხვა სახელმწიფოების ჩართვასაც ითვალისწინებს. მანვე ტურიზმზეც ისაუბრა და აღნიშნა, რომ 2019 წელთან შედარებით ტურიზმი 80-90 პროცენტით აღდგა, რაც მცდარი ინფორმაციაა.

მიიღე ინფორმაცია უფრო სწრაფად „კომერსანტის“ Telegram-ზე.

კონსულტაციები გვაქვს სხვადასხვა ინვესტორებთან, გვინდა რომ დავიწყოთ ჰესების მშენებლობის პროექტები, გვაქვს გეგმა, რომ მათ შორის სახელმწიფომაც მიიღოს ნაწილობრივი მონაწილეობა დიდი პროექტების განხორციელებაში - ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა.

პრემიერ-მინისტრის თქმით, ეკონომიკა იზრდება და თუ შევადარებთ კოვიდამდელ, 2019 წლის პერიოდს, ტურიზმი დაახლოებით 80-90%-ით არის აღდგენილი.

„ეკონომიკა იზრდება, ტურიზმის მატება გვაქვს, 1-2 კვირაში საბოლოო მონაცემები გამოვა და ამის თაობაზე მოგახსენებთ. ტურიზმის აღდგენა ძალიან სწრაფი ტემპით მიმდინარეობს. ჩვენ თუ შევადარებთ კოვიდამდელ, 2019 წლის პერიოდს, დაახლოებით 80-90%-ით არის აღდგენილი. ექსპორტი იზრდება, ახლა ჩვენ კონსულტაციები გვაქვს სხვადასხვა ინვესტორებთან, ჩვენ გვინდა რომ დავიწყოთ ჰესების მშენებლობის პროექტები, მათ შორის სახელმწიფოს ჩართულობით, ამის თაობაზე ძალიან მალე მოგახსენებთ. ჩვენ გვაქვს გეგმა, რომ მათ შორის სახელმწიფომაც მიიღოს ნაწილობრივი მონაწილეობა დიდი პროექტების განხორციელებაში ",- განაცხადა პრემიერ-მინისტრმა.

პრემიერის განცხადება ტურიზმთან მიმართებაში ოფიციალურ სტატისტიკას მკვეთრადაა აცდენილი. ტურიზმის ადმინისტრაციის ცნობით, იანვარ-მარტში საქართველოს სულ 517 ათასი ვიზიტორი სტუმრობდა, რაც 2019 წლის ანალოგიურ პერიოდთან შედარებით 61.2%-ით ნაკლებია, ანუ აღდგენის ტემპი 38.8%-ს შეადგენს, შედარებით უკეთესი მდგომარეობაა უშუალოდ ტურისტებთან მიმართებაში, თუმცა ამ შემთხვევაშიც ტურისტული დანიშნულების ვიზიტების რაოდენობაც 52%-ით არის აღდგენილი და არა 80 ან 90 პროცენტით.