მთავრობა მომავალ წელს ქუთაისის აეროპორტში ასაფრენ-დასაფრენი ზოლის მშენებლობას გეგმავს. ამის შესახებ ინფორმაცია, მთავრობის მიერ გამოქვეყნებულ ახალ დოკუმენტში „ხედვა 2030 საქართველოს განვითარების სტრატეგიაშია“ აღნიშნული.

დოკუმენტის მიხედვით, 2023 წელს ქუთაისის აეროპორტში იგეგმება ახალი, 3,200-3,500-მეტრიანი ასაფრენ-დასაფრენი ზოლის და შესაბამისი სააეროდრომო ინფრასტრუქტურის მშენებლობა.

„ქვეყნის საჰაერო სატვირთო გადაზიდვების პოტენციალის გაუმჯობესებისა და ასევე ქუთაისის აეროპორტის მომსახურების არეალის გაზრდის მიზნით, 2023 წელს იგეგმება ახალი, 3,200-3,500-მეტრიანი ასაფრენ-დასაფრენი ზოლის (ადზ) და შესაბამისი სააეროდრომო ინფრასტრუქტურის მშენებლობა. აღნიშნული გააჩენს შესაძლებლობას, ქუთაისის საერთაშორისო აეროპორტით ისარგებლონ დიდი ზომის (ე. წ. wide body) საჰაერო ხომალდებმა, რაც შორი მანძილებიდან ახალი ავია-მიმართულებების დამატების ერთ-ერთი ხელშემწყობი ფაქტორია. ამასთანავე, ახალი ზოლის მშენებლობა ხელს შეუწყობს აეროპორტთან ლოგისტიკური ცენტრისა და სატვირთო ტერმინალის განვითარების შესაძლებლობას.

აეროპორტების შემდგომი განვითარებისა და ტურიზმის ხელშეწყობისთვის შემუშავდება სტრატეგიული რეკომენდაციები, რომელთა საფუძველზე განისაზღვრება საერთაშორისო და ადგილობრივი აეროპორტების შემდგომი განვითარების გრძელვადიანი გეგმა“, - ნათქვამია დოკუმენტში.

თბილისის აეროპორტის გარდა, ქუთაისში ან ბათუმში ტერმინალის შექმნას მოითხოვს უკვე წლებია ექსპორტიორი კომპანიების უმრავლესობა. მათი დიდი ნაწილი „კომერსანტთან“ ამბობს, რომ საჰაერო ტვირთებს დღემდე, მხოლოდ თბილისი ემსახურება, ამიტომ მითუმეტეს დღეს, როდესაც ტვირთნაკადები ასეთი გაზრდილია, სხვაგან ტერმინალების არსებობის აუცილებლობა უკვე აშკარად გამოჩნდა.

2017 წელს სახელმწიფომ ქუთაისის საერთაშორისო აეროპორტის გაფართოების პროექტი დაიწყო, რომელიც 110 მილიონი ლარის ოდენობის ინვესტიციას ითვალისწინებდა. წელს ოქტომბრის კი ქუთაისის საერთაშორისო აეროპორტის ასაფრენ-დასაფრენი ზოლის რეაბილიტაცია განხორციელდა, რაშიც 8 მლნ ლარი დაიხარჯა.