რიყის დოქები 2012 წელს აშენდა, ის მსოფლიოში ერთ-ერთი საუკეთესო საკონცერტო სივრცე უნდა ყოფილიყო, სადაც მუსიკალური თეატრი და საგამოფენო ცენტრი უნდა განთავსებულიყო.

ამ შემთხვევაში მიზანმა ნამდვილად გაამართლა შესაძლებლობები და თბილისის საკონცერტო დარბაზი, რიყის დოქები 2016 წლის მსოფლიოს ათ საუკეთესო კულტურულ ცენტრს შორის მოხდა.

„სამოქალაქო პლატფორმა 20/20-ის“ თავმჯდომარე ვასო ურუშაძე გვიყვება, რომ „რიყის დოქების“ პროექტზე 75 მილიონი ლარი იყო დახარჯული, თუმცა მიუხედავად ამისა 2012 წელს ახალმა ხელისუფლებამ პროექტი პოლიტიკური მოტივითა და დაუსაბუთებელი არგუმენტებით შეაჩერა, რომელიც დღემდე უფუნქციოდაა დარჩენილი.

„პროექტის გაჩერებით მმართველმა პარტიამ რიყის დოქების პროექტის იდეა მოკლა, ის გააუფასურა და დღეს გვიწყობს წარმოდგენებს, უბრალოდ უფუნქციო შენობა ნაგებობა გამოაქვს აუქციონზე და წარმოაჩენს, თითქოს მას არავინ ყიდულობს. ეს არის იაფფასიანი სანახაობა, რომელიც ემსახურება საზოგადოების შეცდომაში შეყვანას და აზრის ჩამოყალიბებას, თითქოს წინა ხელისუფლების მიერ განხორციელებული პროექტი იყო აზრს მოკლებული და საბიუჯეტო სახსრების არამიზნობრივი გამოყენება. სინამდვილეში ყველაფერი პირიქითაა, რიყის დოქების, ანუ თანამედროვე საკონცერტო დარბაზის მშენებლობა თბილისში იყო გრძელვადიანი ინვესტიცია სახელმწიფოს მხრიდან ქვეყნის ეკონომიკაში, რომელიც მოიტანდა კონკრეტულ სიკეთეს თბილისისთვის.

თანამედროვე საკონცერტო დარბაზის მშენებლობა ხელს შეუწყობდა საერთაშორისო დონის ღონისძიებების გამართვას თბილისში. კულტურული წარმოდგენების, გამოფენების, მოდის ჩვენებების და სხვადასხვა საერთაშორისო დონის ფესტივალების გამართვა თბილისში ხელს შეუწყობდა ტურისტებისა და ვიზიტორების რაოდენობის ზრდას, მოახდენდა ქალაქის პოპულარიზაციას და დაამკვიდრებდა მრავალსაუკუნოვან ტრადიციას, თბილისის, რეგიონის კულტურული ცენტრის შესახებ. თბილისის რეგიონულ კულტურულ ჰაბად ჩამოყალიბება კი სახელმწიფოს მთავარ სტრატეგიას უნდა წარმოადგენდეს, რომელიც ჩვენი ქვეყნის ეკონომიკური განვითარებისთვის სასიცოცხლოდ მნიშვნელოვანია“, - ამბობს ურუშაძე.

ვასო ურუშაძის თქმით, „რიყის დოქების“ პროექტის დასრულების შემთხვევაში მისი ექსპლუატაცია სახელმწიფოს ბიუჯეტს მოუტანდა კონკრეტულ სარგებელს და კერძო სექტორისთვისაც ბევრად საინტერესო იქნებოდა, მისი იჯარით მართვაში აღება ან შეძენა.

„საქართველოს ამჟამინდელმა მთავრობამ კი მოკლა რიყის დოქების იდეა, აქცია ის უბრალო უფუნქციო შენობა ნაგებობად, დღეს კი აცხადებს, რომ მისი შეძენა არავის აღარ სურს, მხოლოდ ერთი მოტივით, წარმოაჩინოს, რომ წინა ხელისუფლების მიერ ამ პროექტზე გაწეული ხარჯები იყო არამიზნობრივი. სინამდვილეში ჩვენ სახეზე გვაქვს თანამდებობრივი გულგრილობის კლასიკური მაგალითი, რომელმაც სახელმწიფო ბიუჯეტს განსაკუთრებით დიდი ოდენობის ზარალი მიაყენა. პროექტის დასრულების შემთხვევაში მისი ექსპლუატაცია სახელმწიფოს ბიუჯეტს მოუტანდა კონკრეტულ სარგებელს და კერძო სექტორისთვისაც ბევრად საინტერესო იქნებოდა, მისი იჯარით მართვაში აღება ან თუნდაც შეძენა. ვინ იყო ამ მავნებლური პოლიტიკური გადაწყვეტილებაზე პასუხისმგებელი თანამდებობის პირი და ვინ უნდა აგოს პასუხი თანამდებობრივ გულგრილობაზე, ალბათ გამოძიებამ უნდა დაადგინოს, რომელიც დიდი ალბათობით ამ ხელისუფლების პირობებში არ დაიწყება“, - აღნიშნავს ვასო ურუშაძე.

რიყის დოქები ეკონომიკის სამინისტროს სახელმწიფო ქონების ეროვნულ სააგენტოს, ჯამში, 4-ჯერ ჰქონდა აუქციონზე გამოტანილი. ბოლოს- 47.5 მლნ ლარად - 50%–იანი ფასდაკლებით, თუმცა 17 მაისს აუქციონიც უშედეგოდ დასრულდა და დაუმთავრებელი რიყის დოქები ისევ ვერ გაიყიდა.

ეკონომიკის მინისტრის, ნათია თურნავას განცხადებით, პოსტპანდემიურ პირობებში ძვირადღირებული ობიექტის გაყიდვა რთულია.

„დღეს, როდესაც პოსტპანდემიურ პერიოდში ვართ რთულია, ძვირადღირებულ ობიექტს ფუნქციონალი მოვუნახოთ. როგორც ღია და გამჭვირვალე აქუციონებმა გამოაჩინა, არ არის მარტივი საკმაოდ ძვირადღირებული ობიექტის გაყიდვა. თითქმის 8-9 თვე ჩვენ ეს ობიექტი აუქციონებზე გაგვაქვს და ის თანხა, რაც ბიუჯეტს და სახელმწიფოს დაუჯდა, ძალიან შორს არის იმ საბაზრო ფასისგან, რომელიც დღეს შიეძლება მასში ინვესტორმა გადაიხადოს“, - განაცხადა ნათია თურნავამ.