მთავრობამ საგარეო ვალების შემცირება დაიწყო. საქართველოსა და ევროპის რეკონსტრუქციისა და განვითარების ბანკს შორის გაფორმებული სასესხო შეთანხმება უქმდება. ფინანსთა სამინისტრო უარს ამბობს 55 მლნ ევროზე, რომელიც ქვეყნის ენერგეტიკული ქსელის გაძლიერებას უნდა მომხმარებოდა.
ფინანსთა მინისტრის პირველი მოადგილემ გიორგი კაკაურიძემ პარლამენტის დარგობრივი ეკონომიკისა და ეკონომიკური პოლიტიკის კომიტეტის ოთხშაბათის სხდომაზე განაცხადა, რომ საქმე ეხება სესხის მე-2 ტრანშის გაუქმებას. მისი თქმით, პროექტის განმახორციელებელი ორგანიზაციაა სს „საქართველოს სახელმწიფო ელექტროსისტემა“ სესხს დამოუკიდებლად, სახელმწიფოს ჩართულობის გარეშე აიღებს. როგორც კაკაურიძე განმარტავს, ამ ეტაპზე სასესხო შეთანხმება არ არის ეფექტური, ვინაიდან საქართველოს ფინანსთა სამინისტროსა და საქართველოს სახელმწიფო ელექტროსისტემას შორის ქვესასესხო ხელშეკრულება არ არის გაფორმებული.
„ქვეყნის ენერგეტიკული ქსელის გაძლიერების პროექტი ფარგლებში 90 მლნ ევროს ოდენობის სესხის აღება იყო გათვალისწინებული. ეს იყო 15–წლიან სესხი, მათ შორის 3 წელიწად-ნახევარი იყო შეღავათიანი პერიოდი. პირველი ტრანშის, 35 მლნ ევროს ათვისება დაგეგმილია მიმდინარე წელს, ხოლო მეორე ტრანშის, 55 მლნ ევროს ათვისება დაგეგმილი იყო 2024 წლიდან. გასულ წელს ბიუჯეტის ფორმირების დროს ბევრი ვისაუბრეთ, რომ მოგვიწევს ვალების შემცირებას. მიუხედავად იმისა, რომ ხელშეკრულება რატიფიცირებული იყო, ეს ხელშეკრულება მოქმედი არ გამხდარა. ვინაიდან ქვესასესხო ხელშეკრულება არ გაფორმებულა. ჩვენ გვქონდა კონსულტაციები სახელმწიფო ელექტროსისტემასთან, თუ რამდენად იქნებოდა შესაძლებელი თვითონ ელექტროსისტემას აეღო მომავალში სესხი და ისე განეხორციელებინა გარკვეული პროექტები. სავარაუდოდ ამდენი მოცულობის სესხის აღება ელექტროსისტემას აღარ დასჭირდება, რადგან ამ წლების განმავლობაში გარკვეული კაპიტალის დაგროვებას თვითონაც შეძლებს და შედარებით ნაკლები მოცულობის სესხის აღება დასჭირდება. ჩვენ ეკონომიკის სამინისტროსთან ერთად მივიღეთ გადაწყვეტილება სესხი აღარ ავიღოთ, 55 მლნ ევროს ტრანში უქმდება. პროექტები, რომლებიც 2024 წლიდან უნდა განხორციელდეს, თვითონ ელექტროსისტემა უზრუნველყოფს ბიუჯეტის გარეშე სახსრების მოზიდვას“, - განაცხადა გიორგი კაკაურიძემ.
შეგახსენებთ, რომ საქართველოს ენერგეტიკული ქსელის გაძლიერების პროექტის სასესხო შეთანხმებას ხელი საქართველოსა და ევროპის რეკონსტრუქციისა და განვითარების ბანკს (EBRD) შორის 2020 წლის 28 ივლისს მოეწერა.
პროექტი ითვალისწინებდა საქართველოს ეროვნული ენერგეტიკული ქსელის გაძლიერებასა და გაუმჯობესებას, შემდეგ კომპონენტებში ინვესტიციის გზით:
პირველი ტრანში: 35 მილიონი ევრო ლაჯანური-წყალტუბოს 500 კვ 49 კმ-იანი ერთჯაჭვა ელექტროგადამცემი ხაზის მშენებლობა, ნამახვანი-წყალტუბოს და წამახვანი-ტვიში-ლაჯანურის ერთჯაჭვა 220 კვ 58 33 ელექტროგადამცემი ხაზების მშენებლობა, ლაჯანურის ახალი ჰიდროელექტროსადგურის 220 კვ 5 კმ ერთჯაჭვა ელექტროგადამცემი ხაზის მშენებლობა;
მეორე ტრანში: 55 მილიონი ევრო - წეწსკრა-მესტიის 110 კვ 57 კმ-იანი ორჯაჭვა ელექტროგადამცემი ხაზის მშენებლობა, ნენსკრას 500/220/110 კვ ქვესადგურის მშენებლობა და წყალტუბოს ქვესადგურის გაფართოება და კავკასიონის 500 კვ ერთჯაჭვა ეგხ-ის შეჭრის და ნენსკრას ქვესადგურის ნენსკრას ჰიდროელექტროსადგურთან 220კვ დაკავშირების მშენებლობა.
პროექტი საქართველოს სახელმწიფო ელექტროსისტემას 2026 წლის 15 ივლისამდე უნდა დაესრულებინა.
განმარტებით ბარათში წერია, რომ ფინანსთა სამინისტრომ EBRD -ს სესხის თანხიდან მეორე ტრანშის გაუქმების და სასესხო შეთანხმებაში შესაბამისი ცვლილების განხორციელების თხოვნით მიმართა.
დოკუმენტის მიხედვით, EBRD -ის მიერ წარმოდგენილ იქნა „საქართველოსა და ევროპის რეკონსტრუქციისა და განვითარების ბანკს შორის სასესხო შეთანხმების ცვლილების მე-2 ტრანშის გაუქმების შეტყობინება.
დარგობრივი ეკონომიკისა და ეკონომიკური პოლიტიკის კომიტეტმა სესხის მე-2 ტრანშის გაუქმებას მხარი დაუჭირა.
ბაჩო ადამია
ფინანსთა სამინსიტრო
