ინფლაციური პროცესების შეკავება შეუძლებელი ხდება. საქართველოში მაისში ინფლაცია, წლიურ გამოსახულებაში, მკვეთრად გაიზარდა და 13,3%-ის დონეზეა. პრობლემა გლობალური მასშტაბისაა და გავლენა ნებისმიერ შემთხვევაში გვექნება, თუმცა სასიცოცხლოდ მნიშვნელოვანია, ინფლაციის შესამცირებლად ქმედითი ნაბიჯები გადაიდგას. სპეციალისტები მთავრობას ანტიინფლაციური პროგრამის შემუშავებას ურჩევენ.

ადგილობრივი თვითმმართველობის ეროვნული ასოციაციის ექსპერტი, ეკონომისტი დავით ზარდიაშვილი ,,კომერსანტთან“ ამბობს, რომ ინფლაციის ზრდის ტენდენცია გაგრძელდება და აუცილებელია, დროულად იქნას შემაკავებელი ზომები მიღებული, რომ მოსახლეობა ამ პრობლემას ნაკლები დანაკარგით გაუმკლავდეს.

,,ინფლაცია გლობალური პრობლემაა, მისგან ვერ დავიძვრენთ თავს, მაგრამ ქმედითი ნაბიჯები უნდა გადაიდგას რაც შეიძლება სწორად და დროულად. პირველ რიგში, ანტიინფლაციური ღონისძიებები უნდა დაჩქარდეს, შესაბამისი პროგრამა არის შესამუშავებელი. რეფინანსირების განაკვეთითაც შეიძლება ამის მეტნაკლებად რეგულირება. ამ მექანიზმის სწორად გამოყენებით ინფლაციის გარკვეულ დონეზე შეკავება შესაძლებელია. რა თქმა უნდა, მთავარი მექანიზმი ეკონომიკის გააქტიურება, წარმოების ზრდაა. რამდენიმე სერიოზული პროგრამა მუშაობს, მაგრამ არასაკმარისია, მეტი ჩართულობაა საჭირო’, - ამბობს ზარდიაშვილი.

მისი თქმით,  ფასების ზრდა იმდენად საგანგაშო არ არის, მაგრამ როგორმე უნდა მოხერხდეს, რომ ამ პროცესის პარალელურად შემოსავლებიც იზრდებოდეს.

,,მეტი სამუშაო ადგილი უნდა შეიქმნას და სამამულო წარმოება განვითარდეს. სხვა გამოსავალი არ გვაქვს, როცა მთელ მსოფლიოში ეკონომიკური მდგომარეობა უარესდება. მაქსიმალური მობილიზება დაგვჭირდება, რომ ეკონომიკური აქტიურობა მოხერხდეს. მეტი სოციალური გარანტიებია საჭირო, რათა მოსახლეობა ინფლაციას გაუმკლავდეს. სოფლის მეურნეობა სტრუქტურულ გაუმჯობესებას საჭიროებს. ქვეყანა პურის დიდი მომხმარებელია და წარმოების ზრდაზე უნდა ვიყოთ ორიენტირებული. ვფიქრობ, პურის ფასის ხელოვნურად დაჭერას სჯობს, ეს რესურსი წარმოების განვითარებისკენ იქნას მიმართული და ფერმერებს მეტი მოტივაცია შევუქმნათ“, - აცხადებს დავით ზარდიაშვილი ,,კომერსანტთან“.

ცნობისთვის, 2022 წლის მაისში წინა თვესთან შედარებით ინფლაციის დონემ საქართველოში 1.1 პროცენტი, ხოლო წლიური ინფლაციის დონემ 13.3 პროცენტი შეადგინა. ამის შესახებ ინფორმაციას საქართველოს სტატისტიკის ეროვნული სამსახური ავრცელებს.

„საქსტატის“ ცნობით, რაც შეეხება საბაზო ინფლაციას , აღნიშნულმა მაჩვენებელმა 2022 წლის მაისში, გასული წლის შესაბამის პერიოდთან შედარებით 5.9 პროცენტი შეადგინა, ხოლო თამბაქოს გარეშე წლიური საბაზო ინფლაციის მაჩვენებელი 6.7 პროცენტით განისაზღვრა.

წლიურ ჭრილში, ყველაზე მეტად გაძვირდა  ბოსტნეული და ბაღჩეული (51.1 პროცენტი), შემდეგ უკვე პური და პურპროდუქტები (34.5 პროცენტი), ხოლო მინერალური და წყაროს წყალი, უალკოჰოლო სასმელები და ნატურალური წვენები ინფლაციის (23.5 პროცენტი) გაძვირებით მესამე ადგილზეა.

მარი ჩიტაია