ბიზნესის ნაწილს სამუშაო გრაფიკი შეეცვალა. მთავრობამ დაამტკიცა სპეციფიკური სამუშაო რეჟიმის მქონე დარგების ჩამონათვალი, რომელთაც 48 საათიანი სამუშაო კვირა აქვთ, ასეთი საწარმოების რიცხვი ახალი დადგენილებით შემცირებულია, შესაბამისად იმ საწარმოებში, რომლებიც ჩამონათვალში ვეღარ მოხვდნენ  სამუშაო საათები კვირაში 40 საათს უნდა შეადგენდეს.

თემასთან დაკავშირებით რადიო „კომერსანტის“ ეთერში საქართველოს დამსაქმებელთა ასოციაციის იურიდიული დეპარტამენტის ხელმძღვანელმა ნიკოლოზ აბუთიძემ ისაუბრა. მისი თქმით, მთავრობას პოზიციები სექტორთან არ შეუჯერებია.

“აღნიშნულ გადაწყვეტილებას ბიზნესი დიდი ხანია ელოდა. ჩვენც არაერთი პოზიცია და მოსაზრება წარვადგინეთ მთავრობაში, საბოლოო სიასთან დაკავშირებით ჩვენი პოზიციები ვერ შეჯერდა მაინც. ჩვენ არ ვიყავით ამ პროცესში ბოლომდე ჩართული და გვქონდა მოლოდინი, რომ სია უფრო დეტალურად იქნებოდა გავლილი. არის გარკვეული გაუგებრობა იმასთან დაკავშირებით, თუ რამ განაპირობა ამა თუ იმ დარგის ამოღება. რატომ იყო, რომ მშენებლობა ან რესტორნები უწყვეტ რეჟიმს ექვემდებარებოდა და ახლა აღარ, ამ კითხვებზე პასუხები არც განხილვის დროს და არც შემდგომ არ გვქონია,“ - განაცხადა ნიკოლოზ აბუთიძემ. მისი თქმით, პროცესში აქტიურად არ ყოფილა ჩართული არც ბიზნესსექტორი.

აბუთიძის თქმით, ახსნილი უნდა იყოს, მიზანი რა არის და განსხვავებული მიდგომა რით არის განპირობებული.

„ესაა, როცა დამსაქმებელს 8 საათი არ ჰყოფნის სამუშაო პროცესის დასასრულებლად. ცოტა საკამათოა, პრაქტიკაში, თუ რა არის უწყვეტობა. არ უნდა წარმოვიდგინოთ, რომ ამ პროცესში არ შეიძლება სამუშაო კადრის შეცვლა ან სხვა პირის დასაქმება. აქ სამუშაო პროცესი არის ისე აგებული, რომ ადამიანის მხრიდან კონტროლს ნაკლებად ექვემდებარება. მაგალითად მშენებლობაზე, როდესაც დაიწყებ ცემენტის ჩასხმას, ან სამშენებლო სამუშაოებს, შეიძლება 8 საათში ვერ დაასრულო იმიტომ, რომ ბუნებრივი პროცესები მიმდინარეობს და არაა ჩვენზე დამოკიდებული. ეს ნუსხა არის იდეა, რომ მეწარმეები იქნენ წახალისებული და ზეგანაკვეთური სამსახური მათთვის არ იყოს ყოველდღიურობა ან კადრების რაოდენობა ისე არ გაეზარდოთ, რომ ბიზნესს ხელი შეეშალოს. არსი არის ის, რომ გონივრული ოდენობით წაახალისონ ის დარგები, რომლებსაც სჭირდებათ 8 საათზე მეტი სამუშაო დრო. ამას არ უნდა შევხედოთ იმ კუთხით, რომ ადამიანების ექსპლუატაცია მიმდინარეობს,“- განაცხადა აბუთიძემ.

ნიკოლოზ აბუთიძის თქმით, ამ გადაწყვეტილებით ბიზნესს ხარჯები გაეზრდება.

„ზეგანაკვეთური სამუშაო არ უნდა იყოს ყოველდღიურობა. თუნდაც ავუნაზღაუროთ და თვითონაც თანახმა იყვნენ, ეს ზეგანაკვეთურის არსს ეწინააღმდეგება. იმ სამსახურებში, სადაც სჭირდებოდათ 10 საათი მუშაობა, მოუწევთ რომ ნახევარ განაკვეთზე აიყვანონ ადამიანები, რათა ყოველდღიურად ერთი და იმავე ადამიანს არ მოუწიოს ზეგანაკვეთური მუშაობა,“ - აღნიშნა აბუთიძემ.